दमौली/राजनीतिक महत्वाकाँक्षाले प्रभावित कार्यकर्ताको दिनचर्या कुदाकुदको अवस्थामा देखिएका छन् भने चुनाव जित्न हम्मेहम्मे ठानेका नेताहरुलाई भगौडा कार्यकर्ता छोपाछोपको हैरानी देखिएको छ ।
निर्वाचन आयोगले दशैंले राम्रोसंग नछोड्दै उम्मेदवारी दर्ता गर्ने मिति तोकि दिएपछि यस बर्षको दशै राजनीतिक जागिर खाने सपना बोकेकाहरुलाई कुदाकुद र छोपाछोपको दशैं बनेको छ ।
निर्वाचनमा उम्मेदवारी नपाउने भएपछि कार्यकर्ता पंक्तिमा कुदाकुदको अवस्था देखिएको छ भने पार्टीबाट टिकट पाउने सुनिश्चित भएका नेताहरुलाई भगौडा कार्यकर्तालाई समेल्न छोपाछोपको हैरानी परेको छ ।
विशेषगरी नेपाली काँग्रेसका कार्यकर्ता कोही घण्टी बजाउँदै कुद्न थालेका थिए भने कोही कार्यकर्ता रेल र पानी जहाजको सपना देखेर भाग्दै थिए । यी दुवै थरी नेपाली काग्रेससम्बद्ध कार्यकर्ता त्यसमाथि निर्वाचन क्षेत्र नं. १ कै कार्यकर्ता भएका कारण यो क्षेत्रबाट संघीय निर्वाचनमा चुनाव जितेर प्रधानमन्त्री बनेर मर्ने अन्तिम इच्छा प्रकट गरेका नेता रामचन्द्र पौडेल त्यो हैरानी भोग्ने नेता भएका छन् । पानीको माछा फुत्के झै कार्यकर्ता फुत्कन खोज्ने, रामचन्द्र पौडेल माझी बनेर कार्यकर्ता छोप्ने हैरानीमा यस बर्षको दशैं उनका लागि दशा नै बनेको अहिलेको परिस्थितिले देखाएको छ ।
पौडेलले आफ्ने विरुद्ध चुनाव लडेका पूर्णबहादुर गुरुङलाई चोख्याएर चुनाव लड्दा पनि उठ्नै नसकेर लडेका थिए । यस पटकको आमनिर्वाचनमा पनि पूर्ण बहादुर गुरुङ्ग एमाले प्रवेश गर्ने हल्ला व्यापक भएपछि अन्ततः बुधबारसम्म आईपुग्दा माझी बनेर त्यसलाई छोप्न पौडेल सफल भएका छन् । त्यसैगरी डा. शेषरमण न्यौपाने रवि लामिछानेको कार्यकर्ता बनेर घण्टी बजाउँदै आफू विरुद्ध चुनावी मैदानमा आउने सार्वजनिक भएपछि उनलाई पनि छोपेर फुर्लुङमा हाल्न रामचन्द्र पौडेल सफल भएका छन् । मौकाको खोजीमा रहेका मानकाजी श्रेष्ठले अवसर पाए कुदाकुदको दौडमा भाग लिने मनस्थितिमा भएको चर्चा तनहुँको राजनीतिक बृत्तमा चल्न थालेको छ । त्यति मात्रै होइन मनोनय दर्ता गर्ने असोज २३ गतेका दिनसम्म भावि प्रधानमन्त्री कतिपटक माझी बन्न पर्ने हो प्रतिक्षाको विषय बनेको छ । जे होस् यसपालिको दशैंमा अवसर खोज्ने र दिनेको बीच कुँदाकुद र छोपाछोपको दशै बन्नेमा भने दुईमत नरहने देखिएको छ ।
