चुनावमा सहयोग गर्नेलाई जोशीको धन्यवाद

दमौली/प्रतिनिधि सभा २०७९ मा क्षेत्र नं. १ बाट कैची चिन्ह लिएर स्वतन्त्र उम्मेदवारी दिएका गोविन्दराज जोशीले चुनावमा लेखेर सहयोग गर्ने पत्रकार, मतदान गरेर सहयोग गर्ने मतदाता र विभिन्न माध्यमबाट सहयोग गर्ने समेतका शुभेच्छुकहरुलाई धन्यवाद ज्ञापन गर्नुभएको छ ।
सिद्धान्त, आचारण र व्यवहारबाट नै नेपाली काँग्रेस रहेकाहरु सत्ताकेन्द्रित गठबन्धन विरोधी अभियानमा लागेको चर्चा गर्दै नेता जोशीले चुनाव एउटा अभियान हो, सक्रिय कार्यकर्ताको समिक्षात्मक भेला मार्फत एउटा सन्देश दिने बताउनु भयो । यो अभियानमा लाग्नेहरुको राजनीतिक भविष्य उज्जल छ भन्दै नेता जोशीले नेपाली काँग्रसको पहिचान यही अभियानले बचाउने विश्वास व्यक्त गर्नुभएको थियो । नेपाली काँग्रेसको सदस्यता लिएर नेतृत्वमा रहनेहरु सिद्धान्त, आचारण र व्यवहारबाटै नेपाली काँग्रेसबाट विचलित भै सत्तास्वार्थको गठबन्धनमा लाग्दा नेपाली काँग्रेस कमजोर भएको जोशीको आरोप थियो ।
चुनावी परिणाम पछि मंसिर ११ गते आयोजित पत्रकार सम्मेलनमा सत्ताको लागि गठबन्धन पद्धतिले लोकतन्त्रलाई कमजोर बनाउँछ भन्ने बुझेर गठबन्धनको विरुद्धमा आफूले उम्मेदवारी दिएको बताउनु भएको थियो । नेपाली काँग्रेसको पूर्व सहमहामन्त्री गोविन्दराज जोशीले २० बर्षदेखि नेपाली काँग्रेस नेतृत्वले आफूलाई लखेटेर काँग्रेसलाई कमजोर बनाएको निष्कर्ष सहित नेपाली काँग्रेसलाई सबल र सक्षम बनाउने अभियान स्वरुप जनभावना अनुसार उम्मेदवारी दिएको चुनावी अभियानमा बताउनु भएको थियो । सत्तागठबन्धनले गराएको निर्वाचनले मुलुकलाई राजनीतिक अस्थिरतातर्फ धकेलिदिएको जोशीको ठहर थियो ।
चुनावी परिणामलाई आत्मसाथ गर्दै नेपाली काँग्रेसलाई सवल र सक्षम बनाउने आफ्नो अभियान जारी रहने पनि नेता जोशीले सो पत्रकार सम्मेलनमा स्पष्ट पार्नुभएको थियो