दमौली/महालेखा परीक्षकको कार्यालयले सार्वजनिक गरेको आर्थिक वर्ष २०८१ ८२ को विवरण अनुसार तनहुँ जिल्लामा सबैभन्दा बढी बेरुजु आँबुखैरेनी गाउँपालिकाको देखिएको छ ।
आँबुखैरेनी गापा कुल लेखापरिक्षण भएको बजेटको ३.३६ प्रतिशत सहित सबैभन्दा धेरै बेरुजु हुने पालिकामा पर्दा भिमाद भने ०.३१ प्रतिशत सहित सबैभन्दा कम बेरुजु हुने पालिकामा परेको छ ।
उक्त आर्थिक वर्षमा आँबुखैरेनीको रु चार करोड दुई लाख १९ हजार बेरुजु छ । त्यसअवधिमा रु एक अर्ब १९ करोड ८० लाख ४८ हजारको लेखापरीक्षण गरिएको थियो । उता भिमाद नगरपालिकाको बेरुजु भने ०.३१ प्रतिशतमात्रै छ । नगरपालिकाको रु एक अर्ब ५३ करोड ७४ लाख सात हजारको लेखापरीक्षण गरिएकामा रु ४७ लाख छ हजार बेरुजु रहेको महालेखाको विवरणमा उल्लेख छ ।
यसैगरी व्यास नगरपालिकाको रु तीन अर्ब १९ करोड ६१ लाख ९४ हजारको लेखापरीक्षण गरिएकामा रु नौ करोड ५४ लाख ८२ हजार (२.९९ प्रतिशत) बेरुजु देखिएको छ । बन्दीपुर गाउँपालिकाको रु एक अर्ब १० करोड ६६ लाख ४० हजारको लेखापरीक्षण गरिएकामा रु तीन करोड पाँच लाख ८४ हजार(२.७६ प्रतिशत) बेरुजु सहित तेस्रो स्थानमा रहेको छ ।
यसपछि क्रमषः शुक्लागण्डकी नगरपालिकाको रु दुई अर्ब ३७ करोड २३ लाख ५५ हजारको लेखापरीक्षण गरिएकामा रु चार करोड ७५ लाख ३२ हजार (२ प्रतिशत), भानु नगरपालिकाको रु दुई अर्ब नौ करोड दुई लाख ७५ हजारको लेखापरीक्षण गरिएकामा रु चार करोड छ लाख ३६ हजार (१.९४ प्रतिशत), म्याग्दे गाउँपालिकाको रु एक अर्ब २९ करोड १६ लाख ३१ हजारको लेखापरीक्षण गरिएकामा रु दुई करोड ४० लाख ४० हजार (१.८६ प्रतिशत), देवघाट गाउँपालिकाको रु एक अर्ब छ करोड ८८ लाख ९७ हजारको लेखापरीक्षण गरिएकामा रु एक करोड ४३ लाख ५५ हजार (१.३४ प्रतिशत), ऋषिङ गाउँपालिकाको रु एक अर्ब २३ करोड चार लाख ३३ हजारको लेखापरीक्षण गरिएकामा रु एक करोड ५२ लाख ३२ हजार (१.२४ प्रतिशत), घिरिङ गाउँपालिकाको रु ९४ करोड ४३ लाख ९३ हजारको लेखापरीक्षण गरिएकामा रु ९१ लाख ३५ हजार (०.९७ प्रतिशत) बेरुजु रहेको छ ।
