दमौली/जिल्ला भित्रका शिक्षकहरु गम्भीर विरामी पर्दा वा दुर्घटनामा पर्दा सहयोग पुगोस् भन्ने हेतुले तनहुँमा स्थापना भएको शिक्षक कल्याणकारी कोष अहिले निष्कृय बनेको छ । पछिल्ला दिनहरुमा शिक्षकहरुलाई कोषका तर्फबाट सहायता प्रदान गरिएका समाचारहरु आउन छाडेसंगै कोष निष्कृय भएको अनुमान लगाउन थालिएको हो । शिक्षक संघ तनहुँका निवर्तमान अध्यक्ष कमलभक्त पोखरेलको परिकल्पनामा सुरु कोषले २५ लाखभन्दा बढी रकम गम्भीर विरामी परेका, दुर्घटनामा घाइते भएका शिक्षकहरु तथा मृतक शिक्षकको परिवारलाई सहायत स्वरुप वितरण गरिसकेको छ ।
कोषका सदस्य शिक्षकलाई गम्भीर रोगको उपचारमा प्रति शिक्षक ५२ हजार रुपैयाँका दरले कोषबाट रकम उपलब्ध गराउने व्यवस्था छ भने सदस्य शिक्षकको मृत्यु भएमा किरिया खर्च बापत छुट्टै १३ हजार रुपैयाँ दिने कोषको विधानमा उल्लेख छ । तर पछिल्ला दिनहरुमा कोषको सदस्य बन्ने शिक्षकको संख्यामा कमि आएको मात्र छैन कोषमा भएको रकम समेत विधान बमोजिम सहायता पाउनु पर्ने शिक्षकले नपाउँदा कोषको अस्तित्व समाप्त हुने जस्तो देखिएको छ ।
कोषका परिकल्पनाकार पोखरेलसंग सुरुमा व्यक्तिगत फाइदाका लागि अवधारणा ल्याएको शंका रहेकाले शिक्षकहरुलाई विश्वास दिलाउन निकै कठिन भएको अनुभव छ । पोखरेल भन्छन्, तर कोषको स्थापना भएर गम्भीर विरामी परेका शिक्षकलाई उपचार खर्च तथा मृत शिक्षकका परिवारलाई किरिया खर्च वापत सहायता प्रदान गर्न थालिएसंगै शिक्षकहरुले कार्यक्रम आफ्नो लागि भएको अनुभूति गर्न थालेका थिए ।
कोषलाई देशव्यापि बनाउने योजनामा रहेका पोखरेल प्रतिदिन एक रुपैयाँका दरले वर्षको ३६५ रुपैयाँ तिरेर सदस्य बन्न पाइने व्यवस्था रहको तर सदस्य बनाउन निकै कठिन भएको आफ्नो अनुभव रहेको बताउँछन् । के अव कोष निष्कृय नै भएको हो त ? भन्ने प्रश्नमा पोखरेल कोषमा अझै केही रकम रहेको तथा कतिपय शिक्षकहरुले अझै कोषमा निरन्तर आफ्नो योगदान गरिहरकाले निष्कृय भएको भन्न नमिल्ने पोखरेलको बुझाई रहेको छ । नेतृत्व परिवर्तन पछि पीडित शिक्षक तथा परिवारलाई सहायता वितरण गर्ने काममा भने शिथिलता आएको आमशिक्षकहरुको बुझाई रहेको छ ।