देउवाले पाए विश्वासको मत
अग्नी परीक्षा सुरु, उत्तिर्ण होलान देउवा ?
रमेश विकल
मंगलबार असार २९ मा नेपालको ४३ औं प्रधानमन्त्रीका रुपमा नियुक्त भएका कांग्रेस सभापती तथा कांग्रेस संसदीय दलका नेता शेरबहादुर देउवाले आइतबार संसदबाट विश्वासको मत प्राप्त गरेका छन् ।
प्रधानमन्त्री नियुक्त भएको एक महिनामा विश्वासको मत लिनु पर्ने संवैधानिक प्रावधान बमोजिम नियुक्तिको हप्ता नवित्दै दोस्रो पटक पुनः स्थापित संसदको पहिलो बैठक तथा संसदको आठौं बैठकमा विश्वासको मतका लागि प्रस्ताव गरेका देउवाले १६५ सांसदको विश्वास प्राप्त गरेका हुन् । देउवाको प्रस्तावको विपक्षमा एमालेका ८३ सांसदको मत परको थियो भने १ जना तटस्थ बसेका थिए । प्रतिनिधि सभामा हाल कायम २७१ सदस्य संख्यालाई हेर्दा देउवाले १३६ सांसदको विश्वास प्राप्त गर्नुपर्ने थियो । देउवाले आफ्नै दल नेपाली कांग्रेसको ६१, माओवादी केन्द्रको ४८, जसपाको ३२, एमाले माधव–झलनाथ समूहका सांसदको १४, एमाले ओली समूहका ८ तथा जनमोर्चा नेपालको १ र १ स्वतन्त्र सांसद गरी १६५ सांसदको समर्थन
पाए ।
सबैले जानेका कुरा हो देउवाका सामु चुनौतिका चाङ छन् । जनता कोरोनाको कहरबाट आक्रान्त छन् तर देउवाले स्वास्थ्य मन्त्री नियुक्त गर्न सकेका छैनन । यसबाट बुझ्न सकिन्छ, देउवाको अप्ठ्यारो । ओलीले गरेका तमाम विकर्म (जे गर्न हुन्छ र पर्छ भनिएको छ ती सबै नगर्ने र जे गर्न हुन्न भनिएको छ र गर्न हुँदैन ती सबै गर्ने) हरुलाई सच्याउँदै लग्नु छ । ओलीले भने म भ्रष्टाचार गर्दिन र हुनपनि दिन्न । तर उनकै पालामा भ्रष्टाचारका ठूला ठूला काण्डहरु भए । संसद अपहरण सम्मका काण्ड भए भने कोरोना महामारीले नागरिक आक्रान्त भएरहँदा ओलीका स्वास्थ्य मन्त्री भने औषधी आयात सम्बन्धि भ्रष्टाचारमा मुछिए । पानी जहाज र चुच्चे रेल अनि भान्सा भान्सामा ग्याँसको पाईपका भाषण भाषणमै सिमित भए । रुखो र झुठो बोलीले आम नागरिकलाई रुखो र झुठो बोल्ने बनाएर गएका छन् ओली । आलीको कथनी र करणीमा समानता भेटिएन । यस्तो बेला प्रधानमन्त्रीको कुर्सीमा बस्न पुगेका देउवाको काँधका भत्केको सिस्टम बनाउने अनि कथनी र करणीमा समानता ल्याउन चुनौति छ ।
तर विडम्बना देउवासंगबाट पनि आमनागरिकले खास अपेक्षा राखेका छैनन् । ओलीले झै फरक विचार राख्नेलाई अरिंगाल बनेर चिल्न वा बघिनी बनेर झम्टन देउवाले आफ्ना कार्यकर्तालाई निर्देश नगर्लान, बोली र व्यवहारले अरुको शरिरमा, मानमा, मान, सम्मान, इज्जत, यश, कीर्ति, पद, प्रतिष्ठामा चोट पु¥याउने काम देउवाले नगर्लान तर कोरोना तथा बाढी–पहिरोले नागरिक जीवनमा आएको असहजतालाई हटाउने काममा देउवा गम्भीरताका साथ लाग्लान भन्ने आम नागरिकलाई अझै पत्यार लाग्न सकेको छैन ।
ज्योतिषीले सात पटक प्रधानमन्त्री बन्छौ भनेकाले चार पटक प्रधानमन्त्री भइसकेका देउवा फेरी प्रधानमन्त्री हुने कुरामा विश्वस्त भए झै देखिन्थे । र घटनाक्रमले उनलाई पाँचौ पटक प्रधानमन्त्रीको कुर्सीमा विराजमान गराएको छ । तर देउवाको इतिहास नियालेका नागरिक त्यो कुर्सीमा ओलीको सट्टा देउवा बस्दैमा केही भिन्न भइहाल्ने कुरामा आश्वसत हुन सकेका छैनन् । पहिलो पटक संयुक्तसरकारको प्रधानमन्त्रीहुँदा सरकार टिकाउन सांसद खरिद विक्री गरेको, सांसदहरुलाई भन्सार छुट्मा गाडी खरिद सुविधा प्रदान गरेको तथा विरामी नै नभएका सांसदलाई विरामी भएको बहानामा बंैकक पठाएको भनेर देउवा निकै आलोचित भएका थिए । सरकार टिकाउन संसदमा हुने विकृत व्यवहारको सुरुवातकर्ताको रुपमा देउवाको निधारमा कलंकको टीका छ । यसका साथै २०५८ साउन ११ मा दास्रो पटक प्रधानमन्त्री बनेका देउवाले प्रजातन्त्र दरवारमा लगेर बुझाएको आरोप लोकतन्त्र बादीहरुबाट खेप्नु परिरहेको छ ।
देउवालाई विश्वासको मत दिनेहरु नै खराबमध्येबाट कम खराबको छनौट गरेको भनिरहेका बेला उनले आफुलाई कति अब्बल सावित गर्न सक्छन्, अबको केही हप्तामै त्यसका लक्षणहरु देखिने छन् ।
ओलीले भने झै देउवा नेपाली कांग्रेसको अन्तिम प्रधानमन्त्री त बनेनन् तर यदि जन अपेक्षा अनुकूल काम गर्न नसकेको खण्डमा उनी कांग्रेसको अन्तिम प्रधानमन्त्री नै हुनेछन् । कर्मकाण्डी र चाकडी चाप्लुसीमा विश्वास गर्नेहरुको घेराबाट बाहिर आएर साझेदार दलहरुसंगको समन्वयमा काम गर्न सक्दा देउवाका आगामी दिनहरु सहज हुनेछन् भने थप दुई पटक प्रधानमन्त्र बन्ने अवसर पनि उनलाई जुर्नेछ ।