दमौली/वैशाख ३० मा सम्पन्न स्थानीय तहको निर्वाचन परिणाम अन्तिम चरणमा हुँदा नेपाली कांग्रेस पहिलो तथा नेकपा एमाले दोस्रो भएका छन् ।
७५३ स्थानीय तहको निर्वाचन सम्पन्न भएकोमा हिजो साँझसम्म ७५२ पालिकाको अन्तिम नतिजा प्राप्त भएको छ । प्राप्त नतिजा अनुसार नेपाली कांग्रेसले २९३ महानगर, उपमहानगर तथा नगरपालिका मध्ये अन्तिम नतिजा आएका २९२ मध्ये १४१ को प्रमुखमा जित हात पारेको छ जुन ४८.२८ प्रतिशत
हो । ४६० गाउँपालिका मध्ये १८८ पालिकाको प्रमुखमा कांग्रेस उम्मेदबार निर्वाचित भएका छन् । यो ४०.८६ प्रतिशत हो । यसैगरी ११० उपप्रमुख तथा १९० उपाध्यक्षमा कांग्रेसका उम्मेदबार निर्वाचित भएका छन् ।
निर्वाचन आयोगका अनुसार प्रमुख प्रतिपक्षी दल एमालेले ८२ नगर प्रमुख तथा १२३ अध्यक्ष पदमा जित हात पारेको
छ । नगर प्रमुखमा एमालेले जितेको स्थान २८.०८ प्रतिशत हो भने गाउँ पालिकामा जितेको स्थान २६.७३ प्रतिशत हो । नगर उपप्रमुखमा कांग्रेसलाई उछिन्दै एमालेले ११४ उपप्रमुख जितेको छ भने १२६ उपाध्यक्ष एमालेबाट निर्वाचित भएका छन् ।
देशभरका ६ हजार ७४३ वडा मध्ये ६ हजार ७३३ वडाको अन्तिम नतिजा आएको छ । प्राप्त नतिजा अनुसार सबैभन्दा धेरै २ हजार ६६५ वडामा नेपाली कांग्रेसको तर्फबाट उम्मेदबार बनेकाहरु निर्वाचित भएका छन् भने एमालेका तर्फबाट उम्मेदबार बनेर वडाध्यक्ष निर्वाचित हुनेको संख्या २ हजार १३० रहेको छ । यसैगरी महिला सदस्यमा पनि कांग्रेस नै अगाडि छ । उसले आफ्नो तर्फबाट उम्मेदबार बनेका २ हजार ६०६ जनालाई विजयी बनाएको छ भने एमालेका २ हजार ३४५ लाई ीवजयी भएका छन् ।
दलित महिला सदस्यमा कांग्रेसका २ हजार ५५१ तथा एमालेका २ हजार २८८ निर्वाचित भएका छन् । दुइ खुल्ला सदस्यमा नेपाली कांग्रेसका ५ हजार ३०७ निर्वाचित हुँदा दोस्रो भएको एमालेका ४ हजार ६८४ निर्वाचित भएको निर्वाचन आयोगल जनाएको छ ।
कुल ६३२ पालिकाको प्रमुखमा उम्मेदबारी दिएको कांग्रेसका प्रमुख पदका उम्मेदबारले पाएको मत ३७ लाख २४ हजार छ भने ७३० उम्मेदबार उठाएको एमालेका प्रमुख तथा अध्यक्षले पाएको मत ३८ लाख ९ हजार रहेको छ । यही मतलाई आधार मानेर एमालेले लोकप्रिय मतमा आफु कांग्रेसभन्दा अगाडि रहेको दावी गर्ने गरेको छ । तर उम्मेदबारको संख्याका आधारमा हिसाब गर्ने हो भने कांग्रेसको प्रत्येक प्रमुख वा अध्यक्ष पदको उम्मेदबारले औसत ५ हजार ८ भन्दा बढी मत पाएको देखिन्छ भने एमालेका उम्मेदबारले औसत ५ हजार २ सय मत पाएको
देखिन्छ ।
सबै प्रदेशमा कांग्रेस अगाडि
देशभरको नतिजामा अगाडि रहेको कांग्रेस प्रदेशगत नतिजामा पनि सबै प्रदेशमा अगाडि छ । कांग्रसले प्रदेश १ मा ६९ स्थानमा जितेको छ भने दोस्रो भएको एमालेले ४७ स्थानमा जित हासिल गरेको छ । यसैगरी मधेश प्रदेशमा पनि ४६ स्थान सहित कांग्रेस पहिलो भएको छ भने ३० स्थान सहित एमाले दोस्रो स्थानमा छ । राजधानी काठमाण्डौं रहेको बागमती प्रदेशमा ५८ स्थानमा कांग्रेसले जित हात पार्दा एमालेले २६ स्थानमा चित्त बुझाउनु परेको छ । गण्डकी प्रदेशमा भने कांग्रेस एमाले झण्डै बराबरी स्थानमा
छन् । कांग्रेसले ३६ एमालले ३५ स्थानमा जितेका छन् ।
उता लुम्बिनी प्रदेशमा कांग्रेसले ४८ पालिका प्रमुख तथा अध्यक्ष जित्दा एमालेले २७, कर्णाली प्रदेशमा कांग्रेसले ३२ तथा एमालेले १५ र सुदुरपश्चिम प्रदेशमा कांग्रेसले ४० स्थान जित्दा एमालेले २५ स्थानमा जित हात पारेको छ ।
