स्नातक महिलालाई उद्यमशीलता अनुदान

दमौली/ व्यास नगर पालिकाले पालिका भित्रका स्नातक उत्तिर्ण बेरोजगार महिलालाई उद्यमशीलता अनुदान प्रदान गर्ने भएको छ ।
नगर कार्यपालिकाको मंगलबार सम्पन्न बैठकले वडाको सिफारिस तथा निवेदकको प्रस्तावका आधारमा उक्त अनुदान उपलब्ध गराउने निर्णय गरेको हो । अनुदान प्राप्त गर्न स्नातक उत्तिर्ण व्यास नपा भित्रका बेरोजगार महिलाले भाद्र मसान्त भित्र सम्बन्धित वडाको सिफारिस सहित प्रस्ताव पेश गर्नुपर्नेछ ।
मंगलबारको वैठकले व्यास नगरपालिका भित्रका प्रविधिमैत्री विद्यालय निर्माणका लागि प्राप्त ४९ विद्यालयको प्रस्ताव स्विकृत गर्दै प्रत्येक विद्यालयलाई एकलाख रुपैयाँ उपलब्ध गराउने निर्णय गरेको छ । यसैगरी व्यास नगरपालिका भित्र नेपाल सरकारबाट जारी भएको कोभिड–१९ संक्रमण जोखिम नियन्त्रणका लागि स्मार्ट लकडाउन सम्बन्धी कार्यविधि, २०७८ बमोजिम जोखिम क्षेत्रको विश्लेषण गरी लकडाउन गर्ने र विद्यालयहरुमा भरसक अनलाइन र अनलाइन कक्षा सञ्चालन हुन नसकेमा २५ जनाभन्दा बढी कक्षामा नरहने गरी स्वास्थ्य मापदण्ड पालना गर्दै २०७८ भाद्र १३ गतेदेखि प्रत्यक्ष कक्षा गर्ने गरी विद्यालय सञ्चालन गर्न जिल्ला जोखिम व्यवस्थापन समितिमा सिफारिस गरी पठाउने निर्णय बैठकले गरेको छ ।
नगर प्रमुख वैकुण्ठ न्यौपानेको अध्यक्षतामा बसेको वैठकले यास नगरपालिका वडा नं.६, १०, ११, १३, १४ मा प्रधानमन्त्री रोजगार कार्यक्रम अन्तर्गत प्रस्तावित कार्यहरु गर्न पच्चीस लाख रुपैयाँ विनियोजन गर्ने निर्णय समेत गरेको छ ।