दमौली/निर्वाचन आयोगले राष्ट्रपति तथा उपराष्ट्रपतिको निर्वाचको मिति तय गरेको छ ।
सोमबार पत्रकार सम्मेलन मार्फत दिइएको जानकारी अनुसार राष्ट्रपतिको निर्वाचन फागुन २५ गते विहिबार तथा उपराष्ट्रपतिको निर्वाचन चैत्र ३ गते शुक्रबार हुने भएको छ ।
आयोगका प्रवक्ता शालीग्राम शर्मा पौडेलका अनुसार राष्ट्रपति निर्वाचनका लागि मतदाता नामावली प्रकाशन फागुन १० मा गरिने छ । सोही १२ गते मतदाताको अन्तिम नामावली प्रकाशन गरिने र १३ गते मनोनयन दर्ताको समय तोकिएको छ । १३ गते साँझ नै उम्मेदबारको सूचि प्रकाशन गर्ने र आवश्यक अन्य प्रक्रिया पछि १५ गते नामाबली प्रकाशन गर्न कार्यक्रम आयोगले तय गरेको छ ।
उम्मेदवारी फिर्ताका लागि १६ गते एक दिन छुट्याइएको छ । सोही साँझ उम्मेदबारको अन्तिम नामावली प्रकाशन
गरिनेछ । राष्ट्रपति छनौटका लागि मतदान फागुन २५ मा हुनेछ ।
उता उपराष्ट्रपतिको निर्वाचनका लागि मनोनयन दर्ता फागुन २७ मा गर्ने व्यवस्था निर्वाचन आयोगले गरेको छ । आयोगले यस बिचका सबै प्रक्रिया पूरा गरेर २८ गते उम्मेदबारको अन्तिम नामावली प्रकाशन गर्ने जनाएको छ ।
राष्ट्रपति तथा उपराष्ट्रपतिको निर्वाचन प्रदेशगत रुपमा गर्ने गरी तयारी गरेको भएपनि यस पटकका लागि आवश्यक तयारी नपुगेकाले काठमाण्डौमा नै मतदान हुने भएको छ ।
राष्ट्रपति तथा उपराष्ट्रपति निर्वाचनको मिति नजिकिँदै गर्दा दलहरुबिच जोड घटाउनेको श्रृङ्खला पनि सुरु भएको छ । संसदको सबैभन्दा ठूलो दल नेपाली कांग्रेससंग यो निर्वाचनका लागि सबैभन्दा धेरै १६ हजार २२१ मतभार छ । सत्तारुढ एमालेसंग १५ हजार २३३ तथा नेकपा माओवादीको सातहजार ७७५, नेकपा एससंग दुइहजार ५७४, राप्रपासंग दुइहजार ४५० तथा जसपासंग दुइहजार १४५ र राष्ट्रिय स्वतन्त्र पार्टीसंग एकहजार ५८० मतभार रहेको छ ।
यसैगरी जनमत पार्टीसंग एकहजार २४२, लोसपासंग ९७१, उन्मुक्ति पार्टीसंग ८९२, स्वतन्त्रसंग ६५०, मानोनितसंग २३७ र राष्ट्रिय जनमोर्चासंग २०६ मतभार रहेको छ ।
संघीय संसद सदस्य तथा प्रदेशसभा सदस्य मतदाता रहने यो निर्वाचनको कुल मतभार ५२ हजार ७्र०७ रहेको छ र राष्ट्रपतिमा निर्वाचित हुन २६ हजार ३५४ मत आवश्यक हुन्छ ।