“दीगो विकासको लक्ष्य, अपाङ्गता मैत्री भविष्य” नाराका साथ अपाङ्गता भएका व्यक्तिहरुको २८औं अन्तरराष्ट्रिय दिवस सोमबार नेपालमा मनाइयो । सन् १९९२ बाट हरेक वर्षको ३ डिसेम्बर दिन संसारभरि विश्व अपांङ्गता दिवस मनाईन्छ अनि समानता र हौसलाको नारा गुञ्जायमान हुन्छ अनि हाम्रो कामना छ, वर्षभरि यी आवाजहरु गुञ्जिरहुन् । अपाङ्गता भएको जनसंख्यालाई साथै लिएर हिंड्न नसक्ने हो भने संसारले दिगो र फराकिलो विकास पाउन सक्दैन् । समावेशी र समान समाजको परिकल्पना नै आजको टड्कारो आवश्यकता हो ।
हामीलाई थाहा छ, अपाङ्गता विभिन्न किसिमको हुन्छ र हरेक प्रकारका अपाङ्गताका लागि विशेष प्रविधी र ब्यवस्था जरुरी हुन्छ, सबैको ध्यान यसतर्फ पुग्न जरुरी छ । प्रत्येक विद्यालयहरुमा सहज अपाङ्ग मैत्री शिक्षा जस्तैः व्रेल लिपी अनि साङ्केतिक भाषामा शिक्षाको व्यवस्था, विद्यालयमा सहज आवत–जावत गर्न अपाङ्गमैत्री संरचना जरुरी छ ।
आफ्नो जीवनयापनका लागि अर्काको भर पर्न नपरेमा मात्र आत्मस्वाभिमान अनि समानताको भावना पलाउँदछ, सरकार, अन्तरराष्ट्रिय समूदाय र गैरसरकारी संस्थाहरुको पनि अपाङ्गता भएका व्यक्तिहरुको जीवनयापन सीप र आम्दानीको सृजना गर्नेतर्फ ध्यान दिएको पाईन्छ, जुन अत्यन्त राम्रो विषय हो । सीपमूलक व्यवसाय गरेर जीवनयापन गर्न सक्षम बनाउँदै शिक्षाको न्यानो उज्यालोबाट अपाङ्गता भएकै कारणले छुट्न नपरोस्, समाजमा समान ब्यवहार पाईयोस् अनि सहज स्वास्थोपचार व्यवस्थित होस् । अपाङ्गता सोंचले सिमित नहोस् अनि यसमा सबै नागरिकको साथ, सहयोग अनि प्रतिवद्धता रहोस् ।
तपाई हामी चाहे साङ्ग छौं या अपाङ्ग, हामीले चाहेर या नचाहेर अपाङ्गता हुने या नहुने हैन् । अपाङ्गता भएकाहरुलाई माया, सद्भाव, समान हेराई अनि हौसलाको खाँचो छ । वहाँहरुको आत्मविश्वास सदैव कायम रहोस् अनि सृजनात्मक अनि संरचनात्मक कार्यमा वहाँहरुको निरन्तर अर्थपूर्ण सहभागीता होस् ।वास्तवमै समाजलाई र संसारलाई अपाङ्गमैत्री बनाउन जरुरी छ, समावेशी भनेको भाषा, संस्कृती, भू–भाग मात्र नभई अपाङ्ग साथीहरुलाई पनि सहज तवरमा संगै लिएर विकासको दौडमा हिंड्न सफल बनाउनु पनि हो । त्यसैले आउनुहोस् अन्तरराष्ट्रिय अपाङ्गता दिवसको अवसरमा सबैले अपाङ्ग मैत्री वातावरण निर्माण गर्ने वाचा गरौं । यसो हुन सकेमा हाम्रो लोकतन्त्रको परिभाषाले पूर्णता पाउने छ ।