फेरी सर्यो कांग्रेस महाधिवेशन मिति- पार्टीको विश्वसनियतामै आँच आउने आशंका

रमेश विकल
नेपाली कांग्रैसको चौधौं महाधिवेशन चौथो पटक सार्वजनिक कार्यतालिका अनुसार पनि नहुने निश्चित भएको छ । सभापति शेरबहादुर देउवाले मंसिर भित्र महाधिवेशन सक्ने गरी महाधिवेशन कार्यतालिका सार्वजनिक गर्न निर्वाचन समितिलाई आग्रह गरेसंगै चौथोपटक निर्धारित मिति मंसिर ९–१३ मा नहुने भएको हो । बुधबार नयाँ कार्यतालिका सार्वजनिक गर्दै केन्द्रीय महाधिवेशन मंसिर २७–३० मा गर्ने भनिएपनि सो मितिमा पनि महाधिवेशन हुनेमा आशंका बढेको छ ।
२०७२ फागुन तेस्रो साता(२०–२३)१३औं महाधिवेशन गरेर चार वर्षका लागि नयाँ केन्द्रीय समिति तोकेको कांग्रेसको चौधौं महाधिवेशन २०७६ फागुन तेस्रो साता(२३) सम्ममा भैसक्नु पर्ने हो । तर हरेक नेतालाई जस्तै देउवालाई पनि पार्टी सत्तामा रहिरहने तृष्णाले छोडेन र पार्टी विधानमा भएको विशेष अवस्थामा एक वर्ष कार्यकाल लम्ब्याउन सकिने व्यवस्थालाई टेकेर एक वर्ष कार्यकाल थपे । जब त्यतिबेला त्यस्तो कुनै विशेष अवस्था थिएन । एक वर्ष पछि २०७७ फागुन ७–१० मा गर्नेगरी महाधिवेशनको मिति त तोकियो तर सो समयमा महाधिवेशन हुन सकेन ।
यो संगै कांग्रेस विधानमा रहेको पाँच वर्षे कार्यकालको हद म्याद त सकियो तर संविधानमा रहेको व्यवस्थाको अस्त्र प्रयोग गर्दै कांग्रेसले विधान संशोधन गरेर ६ महिना कार्यकाल थप्यो र २०७८ भदौं ७–१० महाधिवेशन गर्ने मिति तोक्यो । विभिन्न बहानामा महाधिवेशन सार्ने बानी जस्तै परेको कांग्रेसले फेरी उक्त मिति परिमार्जन गरी १६–१९ भदौ तोक्यो तर क्रियाशील सदस्य सम्बन्धी विवादका कारण असार ४ मा तेस्रो पटकका लागि निर्धारित मितिमा पनि महाधिवेशन हुन सकेन ।
भदौं १९मा पार्टीको सबैभन्दा तल्लो निकाय, वडाको अधिवेशन गरेर महाधिवेशनको सुरुवात गरेको भएपनि आन्तरिक विवाद नमिलेका कारण मंसिर९–१३ मा गर्ने भनिएको केन्द्रीय महाधिवेशन भने तोकिएको समयमा नहुने भएको छ । दुइ तिहाई जिल्लाको स्थानीय तहको अधिवेशन सकेको तथा १३ जिल्लाको जिल्ला अधिवेशन सकेको भएपनि कतिपय जिल्लाको क्रियाशील सदस्य सम्बन्धी विवाद समाधान हुन नसक्दा समयमा केन्द्रीय अधिवेशन नहुने भएको हो ।
मंसिर अन्तिम साता केन्द्रीय महाधिवेशन गर्ने गरी कार्यतालिका बनाउन निर्वाचन समितिलाई सभापति देउवाले निर्देशन दिएका र सोही अनुसार कार्यतालिका सार्वजनिक भएको भएपनि आमकार्यकर्ता विश्वस्त हुन सकेका छैनन् । अझ निर्वाचन समितिका सदस्यहरुले नै समय अत्यन्त छोटो भएकाले महाधिवेशन गर्न कठिन हुने बताएपछि महाधिवेशन हुने कुरामा रहेको अविश्वास अझ बढेको छ ।
१४ औं महाधिवेशनको कार्यतालिका प्रकाशित त भएको छ तर त्यो कार्यतालिकामा पनि महाधिवेशन हुन्छ कि हुन्न भन्दै गर्दा आमकार्यकर्ता भने बारम्बार महाधिवेशनको कार्यतालिका सार्वजनिक गर्ने तर गर्न नसक्ने कुराले पार्टीको विश्वासनियता मै आँच आउने चिन्तामा छन् । आमकार्यकर्ताको चिन्ता हटाउन र पार्टीको साख गुम्न तथा संवैधानिक हैसियत समेत कायम राख्न पनि बुधबार प्रकाशित कार्यतालिकामा कांग्रेसले आफ्नो चौधौं महाधिवेशन गर्नैपर्छ ।