दमौली/शिक्षा विकास तथा समन्वय इकाइ तनहुँले डेंगी रोकथाम तथा नियन्त्रणमा सघाउन अनुरोध गरेको छ ।
इकाइका निमित्त प्रमुख विश्वप्रकाश रेग्मीद्वारा जारी विज्ञप्तीमा जिल्लाका सबै सामुदायिक तथा संस्थागत विद्यालयहरुलाई डेंगी ज्वरोको उपचार सम्बन्धी सचेतना कार्यक्रम सञ्चालन गर्न अनुरोध गरिएको छ ।
विज्ञप्तीमा जिल्लाका विभिन्न स्थानहरूमा विशेष गरी बजार क्षेत्रहरुमा महामारीको रुपमा डेंगी ज्वरोको प्रकोप फैलिएको र विरामीको संख्या बढ्दो क्रममा रहेको उल्लेख गर्दै डेंगी रोग रोकथाम नियन्त्रण र न्युनिकरणका लागि विद्यालय, घर र सार्वजनिक स्थानहरुमा लामखुट्टेको वासस्थान खोजी गरी फूल पार्ने ठाउँ र लार्भा नष्ट गर्न खोजौ र नष्ट गरौं भन्ने राष्ट्रिय अभियान संचालन गर्न र अभियानलाई सफल बनाउन आग्रह गरिएको छ ।
डेंगी रोग संक्रमित व्यक्तिलाई टोकेको लामखुट्टेबाट अर्को स्वस्थ व्यक्तिलाई लामखुट्टेले टोकेमा डेंगी रोग सर्ने भएकोले विहान प्रार्थनाको समयमा लामखुट्टे नियन्त्रणका उपायहरु, डेंगी ज्वरोबाट बच्ने उपायहरु डेंगी रोगका लक्षणहरु र डेंगी ज्वरोको उपचार सम्बन्धी विषयमा थप सचेतनामूलक कार्यक्रम संचालन गर्नु हुन समेत अनुरोध गरिएको
छ ।