दमौली/बी पी विचार समाज तनहुँको आव्हानमा आज असोज चार गते दमौलीमा कार्यकर्ताको बृहद भेला हुँदैछ ।
समाजका कार्यवहाक अध्यक्ष क्या. रेशमबहादुर गुरुङ्गले दिनुभएको जानकारी अनुसार भेलालाई बी पी विचार राष्ट्रिय समाजका सहसभापति गोविन्दराज जोशीले सम्बोधन गर्ने कार्यक्रम रहेको छ । तनहुँ उद्योग बाणिज्य संघको हलमा हुने सो कार्यक्रममा नेपाली काँग्रेस तनहुँले क्रियाशिल सदस्यता नविकरण नगरिदिएर पाखा पारिएका कार्यकर्ताहरुको भेला हुँदैछ । केन्द्रमा सभापति शेरबहादुर देउवाको उपेक्षामा परेका बरिष्ठ नेता डा. शेखर कोईरालाले छुट्टै भेला गरेर आफ्नो समूहको पहिचान दिई रहेका बेला लामो समयदेखि उपेक्षामा पारिएका कार्यकर्ता बीच देशको समसायिक राजनीति र नेपाली काँग्रेसको आशन्न अधिवेशनमा पार्टीको मूल प्रवाहबाट बाहिर पारिएका कार्यकर्ताहरुको भूमिका बारेमा नेता गोविन्दराज जोशीको उपस्थितिमा बृहद छलफल हुनेछ ।