सवारी क्षमताको यात्रु बोक्ने

दमौली/कोभिड–१९ कोरोना भाईरसको संक्रमणको जोखिम रहि रहेकै समयमा आएको नेपालीहरुको महत्वपूर्ण पर्वको मौका हुने यात्रु चापलाई ख्याल गरेर क्यू फ्रि हुने समयमा पनि क्षमता भन्दा बढी यात्रु राखेर हैरानी दिएको विगतको गुनासोलाई सम्बोधन गर्दै यस बर्ष यातायात व्यवस्थापन समितिको बुधबार बसेको बैठकले महत्वपूर्ण निर्णयहरु गरेको छ ।
बैठकमा नेपाल सरकारले तोकेको स्वास्थ्य तथा सुरक्षाका मापदण्ड र सवारी साधन सञ्चालनको मापदण्ड बमोजिम सीट क्षमता भन्दा बढी यात्रु राख्ने सहमति भएको जिल्ला प्रशासन कार्यालय तनहुँले जनाएको छ । त्यसैगरी चालक दल र सबै यात्रुले अनिवार्य रुपमा मास्क लगाउने, लगाउनु पर्ने निर्णय भएको छ । त्यसैगरी सवारी साधनमा यात्रुलाई उपलब्ध हुन सक्ने गरी स्यानीटाईजरको व्यवस्था गर्नुपर्ने व्यवस्था मिलाइएको छ ।
सवारी साधनलाई प्रत्येक दिन निसंक्रमित गरेर मात्र सावारी साधन चलाउनु पर्ने । सार्वजनिक सवारीमा स्वास्थ्य मापदण्ड पालना गर्ने, गराउने दायित्व सञ्चालक एवं चालकको हुने गरी जिम्मेवार बनाइएको छ । नेपाल सरकारबाट तोकिएको स्वास्थ्य मापदण्डको पालना नभएको पाइएमा सञ्चालक तथा चालकलाई कारवाही गर्ने पनि प्रशासनले सूचना दिएको छ ।
नेपाल सरकार र गण्डकी प्रदेशबाट स्वीकृत भाडा दर भन्दा बढी भाडा लिइएको गुनासो आएको सन्दर्भ उल्लेख गर्दै जिल्ला प्रशासनले सार्वजनिक सवारी साधनले तोकिएको भन्दा बढी भाडा नलिने प्रतिबद्धता सञ्चालक तथा चालक प्रतिनिधिहरुले बैठकमा जनाएका थिए ।
यात्रुहरुसंग मर्यादित व्यवहार गर्न पनि बैठकले सञ्चालक तथा चालकलाई आग्रह गरेको छ ।
स्वीकृत सार्वजनिक सवारी भाडा दर सबै यात्रुहरुले देख्न सक्ने ठाउँमा टाँस गर्न पनि यातायात व्यवस्थापन समितिको बैठकले निर्देश गरेको छ ।
यातायात कम्पनीहरुले चाडपर्वलाई मध्यनजर गरेर सवारी साधन थप गरिरहेको अवस्थामा यात्रु क्षमता भन्दा बढी यात्रु बोकेको पाईएमा तथा छतमा यात्रु राखेर यात्रा गराएको पाइएमा कारवाही गर्ने सूचना बैठकमा सञ्चालक तथा चालकहरुलाई दिइएको छ ।
जिल्ला प्रशासन कार्यालय, प्रहरी र अन्य सरोकारवालाहरुको सहभागितामा सार्वजनिक यातायातको सञ्चालन प्रबन्ध लगायतको विषयमा अनुगमन गरिने पनि प्रशासनले जनाएको छ । चाडबाडको समयमा मानिसहरु अलपत्र पर्ने, दुःख पाउने अवस्थालाई विशेष ध्यान दिएर नेपाल प्रहरी तनहुँले तनहुँका चार ठाउँबाट यात्रु सहायता कक्ष सञ्चालन गर्ने भएको छ । दमौलीमा व्यास–४ भोर्लेटार चोकमा, आँबुखैरेनीको पुलजीपमा, बन्दिपुरको डुंम्रे बजारमा र शुक्लागण्डकीको बेलचौतारामा यात्रु सहायता कक्ष राखेर सुरक्षा एवं सहयोग प्रदान गर्ने व्यवस्था मिलाइएको छ ।