दमौली/विगत १३ महिनादेखि संसदको सबैभन्दा ठूलो दल नेपाली कांग्रेस र दोस्रो ठूलो दल नेकपा एमाले असंसदीय सत्ता सहयात्रामा छन् ।
कांग्रेस सभापति शेरबहादुर देउवा र एमाले अध्यक्ष केपी शर्मा ओलीबीच सात बुँदे सहमतीसँगै सरु भएको सत्ता सहयात्रा भने यतिबेला थुप्रै विरोधाभाष र विमती हुँदै गुज्रिरहेको छ । यी दुइ दलबीच नीतिगत तथा कानून निर्माण सम्बन्धी कुरामा असमझदारी बढ्दै गएको छ र एक किसिमले भन्दा गठबन्धनको औचित्य नै सकिँदै गएको अभाष हुँदैछ ।
संविधान निर्माणको दशक हुनै लाग्दा यसका देखिएका कमि कमजोरी हटाउन संशोधन गर्ने कुरा कांग्रेस–एमाले गठबन्धन बन्दै गर्दा मुल मुद्दाको रुपमा रहेको थियो । तर पछिल्लो समय एमाले त्यो मुद्दाबाट पन्छिन खोज्दैछ । प्रधानमन्त्री ओलीले केही दिन अगाडिको एक पोडकाष्टमा राष्ट्रिय सभामा बहुमत नभएकाले संविधान संशोधनको कुरा अहिले नगरिएको बताए । तर कांग्रेस भने निर्वाचन प्रणाली लगाएतमा देखिएका कमि कमजोरी हटाउन संविधान संशोधन आवश्यक भएको भन्दै कार्यदल बनाएर संशोधनको कार्य अगाडि बढाउने पक्षमा छ ।
निजामती सेवा विधेयकमा सेवाबाट अवकाश पाएका सरकारी अधिकारीलाई सार्वजनिक नियुक्तिमा दुइ वर्षको कुलिङ अफ पिरियड राख्ने सहमति राज्य व्यवस्था तथा सुशासन समितिमा भयो । संसदबाट पास हुने बेला त्यो प्रावधान हटाएको भन्दै समितिका सभापतिलाई दोषी करार गरियो । उनले राजिनामा समेत दिए । तर राष्ट्रिय सभामा पुगेको यो विधेयकमा कुलिङ अफ पिरियडको प्रावधान राख्न नहुने भन्दैै एमाले सांसदहरुले संशोधन हालेका छन् । यसबाट कांग्रेसलाई बदनाम गराउन सहयात्री एमाले नै लागि परेको भनेर आशंका गर्ने ठाउँहरु दिएको छ ।
यतिमात्र होइन, साइबर सुरक्षा विधेयकमा पनि कांग्रेस र एमालेबीच थुप्रै मतभेदहरू छन् । एमाले यो विधेयकमा सजाय सम्बन्धी व्यवस्थालाई कडा बनाउन चाहन्छ भने कांग्रेस खुकुलो बनाउने पक्षमा देखिएको छ । यसका साथै यि दुइ दलबीच भूमि सम्बन्धी विधेयक, विद्यालय शिक्षा विधेयक, संवैधानिक परिषद् सम्बन्धी विधेयक, अख्तियार सम्बन्धी विधेयक, सामाजिक सञ्जाल विधेयक तथा गुप्तचरीसम्बन्धी विधेयकमा प्रसस्त मतभिन्नताहरू देखिएका छन् ।
विपरित राजनैतिक दर्शन र आदर्श बोकेका कांग्रेस र एमालेको सत्ता सहयात्रामा पालो सकिने समय सीमा नजिकिंदै गर्दा बेला विस्तारै दरार आउन थालेको देखिँदैछ । नेताहरू गठबन्धनमा कुनै समस्या नभएको र आगामी निर्वाचनसम्म नै यो गठबन्धन कायम रहने बताउने गर्दछन् । सत्ता सहजै अरुलाई नसुम्पने ओलीले आगामी असारमा देउवालाई सत्ता सुम्पन्छन् भन्ने कुरामा प्रचण्डले भोगेको नियति बुझ्नेहरु आशंका व्यक्त गरिरहेका छन् ।
भिन्न मत भएकाहरु बीच मतान्तर बढ्दै गएको सन्दर्भमा देउवा–ओली सत्ता सहयात्रामा शंकट बढेको छ । मुख मिलाएका तर मुद्दाका हिसाबले नदीका दुइ किनार बन्न पुगेका यि दुइ दलमा सत्तासहयात्रा अब धेरै अगाडि बढ्न नसक्ने अघोषित निष्कर्ष देखिन्छ ।