नेपाल पत्रकार महासंघ समेतको ध्यानाकर्षण

दमौली/व्यास नपाको सभाकक्षमा मंगलबार आयोजित सुशासन कार्यशाला गोष्ठीमा पत्रकारलाई भिडियो खिच्न रोक लगाउने अख्तियार प्रमुखको कार्यलाई निन्दनीय र प्रेस स्वतन्त्रता विरुद्ध ठहर गर्दै नेपाल पत्रकार महासंघ एवं तनहुँ शाखाले असन्तुष्टि जनाएको छ ।
सामाजिक विकास युवा तथा खेलकुद मन्त्रालय गण्डकी प्रदेश पोखरा र जिल्ला प्रशासन कार्यालय तनहुँसँगको सहकार्यमा शुसासनका लागि नागरिक समाज (ट्रान्सपरेन्सी इन्टरनेशनल नेपाल आवद्ध संस्था) कास्कीले “भ्रष्टाचार विरुद्धको सहकार्य” नाराका साथ चैत्र २४ गते आयोजना गरेको गोष्ठिमा अख्तियार दुरुपयोग अनुसन्धान आयोग पोखराका प्रमुख सहसचिव नारायणप्रसाद रेग्मीले सार्वजनिक धारणा राख्दै गर्दा तस्विर तथा भिडियो खिच्दै गरेका पत्रकारलाई एक्कासी भिडियो नखिच्न भन्दै रोक लगाएको घटनाबाट अनुष्ट तनहुँका पत्रकारहरु कार्यक्रम स्थलबाट बाहिरिएका थिए ।
तनहुँका पत्रकारहरु माथि अख्तियार प्रमुख सहसचिव नाारायण प्रसाद रेग्मीले गरेको व्यवहारलाई नेपाल पत्रकार महासंघले महासचिव रामप्रसाद दाहालद्वारा हस्ताक्षरित विज्ञप्ति जारी गर्दै निन्दनीय र प्रेस स्वतन्त्रता विरोधी कार्य भनेको छ । साथै महासंघले प्रेसको संवैधानिक स्वतन्त्रता र अधिकारको ख्याल गरी आगामि दिनमा यस्ता कार्य नदोहो¥याउन संवन्धित निकायको नेपाल पत्रकार महासंघले ध्यानाकर्षण गराएको छ । त्यसै गरी नेपाल पत्रकार महासंघ तनहुँ शाखाले पनि तत्कालै विज्ञप्ति जारी गर्दै अख्तियार प्रमुख रेग्मीद्वारा भिडियो खिच्न रोक लगाइएको घटनाप्रति गम्भीर ध्यानाकर्षण भएको भन्दै महासंघले अदुअआ जस्तो जिम्मेवार संस्थाका प्रमुखबाट सार्वजनिक कार्यक्रम स्थलमा आमन्त्रित पत्रकारहरुले तस्बिर तथा भिडियो खिचिरहेका बेला एक्कासी भिडियो खिच्न रोक लगाएको घटनालाई प्रेस स्वतन्त्रतामाथिको प्रत्यक्ष हस्तक्षेपको रूपमा लिएको जनाएको छ ।
लोकतान्त्रिक व्यवस्थामा स्वतन्त्र प्रेसको भूमिका अत्यन्त महत्वपूर्ण रहँदै आएको सन्दर्भमा अख्तियार दुरुपयोग अनुसन्धान आयोग जस्तो जिम्मेवार संवैधानिक निकायका उच्च अधिकारीबाट प्रेस माथि अमर्यादित अंकुश लगाउने कार्य निन्दनीय र अस्वीकार्य रहेको ठहर महासंघले गरेको छ । महासंघ सभापति धनपति अधिकारी र सचिव कृष्ण न्यौपानेद्वारा संयुक्त हस्ताक्षरित विज्ञप्तिमा घटनाप्रति महासंघ गम्भीर असन्तुष्टि व्यक्त गरेको
छ । यस्ता गतिविधि तत्काल बन्द गर्न र आगामी दिनमा प्रेस स्वतन्त्रताको पूर्ण सम्मान गर्न जोडदार माग गरिएको छ ।