तिन दिन पछि महोत्सव विवाद समाधान

दमौली/तेस्रो आदिवासी जनजाति सांस्कृतिक महोत्सवमा देखिएको तिन दिन देखिको विवाद समाधान भएको छ । ब्यापार व्यवसायमा असर पर्ने भन्दै ब्यापारीक स्टल नराख्न गरेको व्यापारीहरुको मागलाई उद्योेग वाणिज्य संघ दमौली बजार एकाईले साथ दिएपछि आदिवासी जनजाति महासंघ र दमौली बजारका ब्यापारीबिच विवाद सिर्जना भएको थियो । कार्तिक ३० गतेदेखि मंसिर १० गलेसम्म चल्ने महोत्सवमा फेन्सी तथा भाँडाका स्टल घटाउने र वर्षमा कम्तिमा एउटा मात्र महोत्सव गर्ने विषयमा आइतबार दुबै पक्षबिच सहमति भएपछि महोत्सव विवाद टुङ्गिएको हो । विवाद समाधानका लागि जिल्ला समन्वय समितिका प्रमुख शान्तिरमण वाग्लेको पहलमा बसेको बैठकमा द्धिपक्षीय तथा नगरपालिकाको समेत सहभागीता रहेको थियो ।