दमौली/तनहुँ जिल्ला अदालतका न्यायाधीशद्वय समेत ११ जना कर्मचारीमा कोरोना पोजेटिभ देखिएपछि अदालतको सेवामा संकुचन गरिएको छ । बुधबार एक सूचना प्रकाशित गरेर सेवा संकूचन गरिएको स्रेस्तेदार मिनबहादुर कुँवरले बताए ।
अदालतमा हुने जनचापलाई व्यवस्थापन गर्न र संक्रमणबाट सेवाग्राही अनि सेवा प्रदायकलाई सुरक्षण गर्नका लागि अदालतको सेवामा संकुचन गर्न परेको अदालतले जनाएको छ ।
सर्वोच्च अदालतको सूचना समेतलाई आधार लिएर माघ १३ गतेदेखि २८ गतेसम्मका लागि सेवा संकुचन गरेको अदालतको सूचनामा उल्लेख छ ।
सेवा संकुचनमा नपरेका सेवा अर्थात सेवा संकुचनका समयमा अदालतबाट प्रदान गरिने सेवाहरुमा अधिकाँश सरकारवादी मुद्धासंग सम्बन्धित छन् । दुनियावादी सेवाहरुमा मिलापत्र, मुद्धा फिर्ता, डिसमिस तामेली सम्बन्धी कामकारवाहीहरु परेका छन् । सेवा संकुचनका अवधिमा अदालतले मुलुकी फौजदारी कार्यविधि संहिता २०७४ को दफा १५५ बमोजिमका निवेदनहरु लिने र त्यस उपरको सुनवाई गर्ने न्यायीक प्रक्रियालाई पनि संकुचन गरेको छैन । साथसाथै बन्दिप्रत्यक्षीकरणका निवेदनको सुनवाईलापनि संकुचन गरेको छैन ।
अदालतको सूचनाले मिलापत्रलाई संकुचन नगरे हुँदा मिलापत्र हुने प्रकृतिका फिराद, प्रतिउत्तरलाई पनि संकुचन नगरे को बुझिन्छ ।
तर अदालतका स्रेस्तेदार मिनबहादुर कुवँरसंग यो अस्पष्टतालाई स्पष्ट पार्न आग्रह गर्दा आफू पनि विदामा रहेको हुँदा हाजिर भए पछि थप स्पष्ट पार्न सकिने कुरा बताए ।
म्याद थप, पक्राउ पुर्जी, कल डिटेलको अनुमति र जरुरी पक्राउ पुर्जिको समर्थनका सेवा संकुचन छैन । अभियोग पत्र दर्तादेखि पक्राउ परी आएका फरार प्रतिवादीको थुनछेक सम्मका काम पनि हुनेछन् ।