दमौली/तनहुँ समाज हङकङले विभिन्न रोगबाट पीडित तीन बिरामीलाई आर्थिक सहयोग गरेको छ । समाजले शुक्रवार दमौलीमा एक कार्यक्रमको आयोजना गरि विभिन्न रोगबाट पीडित भई उपचार गराउँदै आएका तीन जनालाई जनही एक लाख ७५ हजार रुपैयाँ गरि कुल ५ लाख २५ हजार आर्थिक सहयोग गरिएको समाजले जनाएको छ ।
लामो समयदेखि मृगौला सम्बन्धि समस्याबाट पीडित बनेका ऋषिङ गाउँपालिका–६ का पदम बहादुर आले, सोही समस्याबाट ग्रसित म्याग्दे गाउँपालिका–१ की गमु राना र पिसाब सम्बन्धि समस्या भएका ऋषिङ–७ का कर्ण बहादुर थापाको उपचारका लागि आर्थिक सहयोग गरिएको हो ।
समाजका वरिष्ठ उपाध्यक्ष रुम गुरुङ (रोशन)को संयोजकत्वमा संकलित सहयोग रकम शुक्रबार समाजका पूर्व अध्यक्षद्धय भीमराज गुरुङ,जंगबहादुर थापा, उपाध्यक्ष सुवित गुरुङ र सल्लाहकार श्याम सुन्दर थापाको उपस्थितीमा पीडितलाई हस्तान्तरण गरिएको ।
उक्त रकम विभिन्न शिलशिलामा हङकङ पुगेका ५३ जना तनहुँगेसँग समन्वय गरी संकलन गरिएको उपाध्यक्ष गुरुङले जानकारी दिए ।
सोही क्रममा उपाध्यक्ष गुरुङले तनहुँवासीको दुख ःसुखमा हातोमालो गर्न र एक आपसमा सहयोग आदनप्रदान गर्ने उद्देश्यले २५ वर्ष अगाडि तनहुँ समाज हङकङ स्थापना भएको बताए । यसै क्रममा १५ वर्षदेखि तनहुँको विभिन्न ठाउँमा समाजिक सेवा गर्दै आएको र आगामी दिनमा पनि जिल्लामा भइपरि आउने समस्यामा सहयोग गर्ने प्रतिवद्धता व्यक्त गरे ।
स्थापनाकाल देखिनै समाजिक सेवामा सक्रिय रहदै आएको समाजले विभिन्न रोगबाट पीडित भएका २५ जना भन्दा बढीलाई आर्थिक सहयोग गरिसकेको छ ।त्यस्तै भुकम्पपछिको पूननिर्माण,बाढी पहिरो जस्ता दैवि प्रकोपबाट पीडितलाई सहयोग गर्नुका साथसाथै तनहुँको शिक्षा, स्वास्थ्य,खानेपानी र सञ्चार सम्बन्धि पूर्वाधार बिकास तथा पत्रकारिता प्रवद्र्धनमा समेत सहयोग गर्दै आएको कार्यक्रम संयोजक प्रदीप काफ्लेले जानकारी दिए ।