हिंसा स्वीकार्य छैन-सम्पादकीय

चैत १५ गते काठमाडौंको तीनकुनेमा राजावादी समूहको आन्दोलनका क्रममा भएको आगजनीबाट एभिन्युज टेलिभिजनका पत्रकार सुरेश रजकको आगलागीमा परेर निधन भएको घटना तथा सवारी मजदुर सविन महर्जनको गोली लागेर निधन भएको घटनाले समग्र देश स्तब्ध भएको छ ।
आन्दोलनका कारण दुइ जनाको ज्यान मात्र गएको छैन बरु दर्जनौं घाइते भएका छन् । सञ्चार गृहहरुमा आक्रमण भएको छ । ठूला पसलहरु लुटिएका छन् ।
जनताका सूचनाका पहरेदार एक जुझारु सञ्चारकर्मीले जिउँदै जलेर ज्यान गुमाउनुपर्ने अवस्था आउनु, दिनभर कमाएर साँझ विहान हातमुख जोर्नुपर्ने यातायात मजदुरले गोली खाएर मर्न पर्नु अनि आन्दोलनका नाममा उछ्रृङ्खल समूहबाट सञ्चारगृहमाथि तथा पसलमाथि आक्रमण हुनु दुःखद र निन्दनीय छ ।
मुलुकले अंगालेको खुल्ला समाज र लोकतान्त्रिक पद्दति माथि नै प्रहार गर्ने गरी सञ्चारगृह र सञ्चारकर्मीमाथि भएका यस्ता घटनाको जति नै भत्र्सना र निन्दा गरेपनि पर्याप्त हुँदैन । यस सन्दर्भमा हामीले भुल्न नहुने कुरा के हो भने नेपाली समाजले अब हिंसा थेग्न सक्दैन र हाम्रा लागि कुनै पनि प्रकारको हिंसा स्वीकार छैन । हिंसा,लुटपाट र तोडफोडमा संलग्नहरुको काम क्षम्य छैन ।
निष्पक्ष छानबिन गरी घटनाका दोषी पत्ता लगाएर कानुनको कठघरामा ल्याउनु नागरिकको अभिभावक भनिएको सरकारको प्रमुख दायित्व हो । आशा गरौं यो काममा सरकार प्रतिवद्ध भएर लागि पर्नेछ । र आमा नेपालीले दुःख पर्दा मेरो साथमा राज्य छ भन्ने महसुस गर्न पाउनेछ ।
दुःखको यो घडिमा दिवङ्गत पत्रकार सुरेश रजक तथा यातायात मजदुर सविन महर्जनप्रति भावपूर्ण श्रद्धाञ्जली अर्पण गर्दै शोकाकुल परिवारजनमा गहिरो समवेदना ।
राजनैतिक उद्देश्य प्राप्तीका नाममा हुने हिंसाका घटनाहरु हामी कहाँ धेरै भइसके । अब हामीलाई हिंसा चाहिएको छैन । अहिंसाका पुजारी बुद्ध जन्मेको देशमा हिंसालाई कुनै स्थान छैन र यो आम नेपालीको चाह होइन भन्ने तथ्य सबैले बुझ्नु र आत्मसाथ गर्नु जरुरी छ ।