मानिसले आफु भित्रका अज्ञानता रुपि अन्धकारलाई चिर्दै ज्ञान रुपि दिप प्रदान गर्नु हुने सेतो वस्त्र धारण गर्न तथा हातमा वीणा लिने विद्याकी देवी माता सरस्वतीको पुजा आराधना गर्ने दिन आज । वसन्त पञ्चमी तथा श्रीपञ्चमी नामले पुकारिने आजको दिन सरस्वतीको पुजा आराधना गर्नाले हामीलाई विद्यारुपि धन प्राप्त हुने विश्वास रहेको छ र मानिसहरु सरस्वतीको पुजा आराधना गर्दछन् । आफ्ना पुस्तक, कलम र मसीको तथा संगीत साधकले बाध्यबादन सामग्री, मुर्तिकारले आफ्ना औजार, चित्रकारले आफ्नो कुची अनि गायकले आफ्नो गायन सामग्री आदिको पनि आज पुजा गर्ने चलन छ । समग्रमा आजको दिन र्सिजनाका साधनको पुजा आराधना गर्ने दिन हो ।
आज साना बालबालिकाको अक्षरारम्भ गर्ने दिन पनि हो । यस दिन अक्षरारम्भ गराउँदा बालबालिका पढ्नमा तेज हुन्छन् भन्ने विश्वास रहेको छ । यति मात्र होइन आजबाट वसन्त ऋतुको प्रारम्भ हुन्छ । मुटु छेड्ने जाडो कम हुँदै गएर घमाइलो दिन सुरु हुने तथा वातावरणमा हरियाली छाउने भएकाले मानिसको मन प्रफुल्ल हुन प्रारम्भ आजैबाट हुन्छ ।
आज राष्ट्रिय पुस्तक दिवस पनि हो । पुस्तकको महत्व बझेर होला, थोरोले भनेका छन् “ परानो कोट लगाऊ, नयाँ पुस्तक किन ।” पुस्तक ज्ञानको भण्डार हो । पुस्तक विनम्र साथी हो । पुस्तकको महत्वका विषयमा धेरैले धेरै कुरा भनेका छन् । पछिल्लो समय पठन संस्कृति हराउँदै गएकाले पुस्तकको महत्व कम भएको जस्तो देखिँदै गएको छ । तर हामीले बुझ्नु पर्ने के हो भने पुस्तकको महत्व क्षणिक रुपमा कम भएजस्तो दखिए पनि यथार्थ फरक छ । पुस्तकको महत्व कहिल्यै कम हुँदैन र हुनपनि हुँदैन ।
सरस्वती पुजा, श्रीपञ्चमी तथा वसन्त पञ्चमीको अवसरमा सबैलाई शुभकामना । किताबका हरेक पानामा, हरेक अक्षरमा सरस्वतीको वास होस् र हाम्रा साना बाबुनानीहरु हामीले विश्वास गरेजस्तै पढ्नमा तेज बनुन् । संगीतकारलाई मिठो संगीत सिर्जना गर्ने क्षमता प्राप्त होस् अनि सबैलाई आफ्नो कार्यक्षेत्रमा सफलता प्राप्त होस् ।