तनहुँ कांग्रेसको अपिल

दमौली/नेपाली कांग्रेस तनहुँले विभिन्न कारणले पार्टीबाट अलग भएका पूर्व पार्टी सदस्यहरुलाई मूलधारमा फर्कन आग्रह गरेको छ ।
आइतबार एक विज्ञप्ती प्रकाशित गरी कांग्रेसले पार्टीबाट विभिन्न कारणल अलग रहेका तथा स्वतन्त्र भूमिकामा रहेका सबैलाई पार्टीको सम्मान गर्दै विनासर्त कांग्रेसको मूलधारमा फर्कन आग्रह गरेको हो । सभापति जितप्रकाश आलेले जारी गरेको विज्ञप्तीमा मूलधारमा समाहित हुन आउने सबैको उचित सम्मान र मूल्याङ्न हुने तथा आगामी दिनमा कुनै प्रकारको विभेद नहुने समेत उल्लेख गरिएको छ ।
गत स्थानीय निर्वाचनको समयमा जिम्मेबार व्यक्तिहरु नै पार्टीको आधिकारिक उम्मेदबारको विरुद्ध लागि पर्दा पार्टीलाई क्षति पुगेको उल्लेख गरिएको विज्ञप्तीमा पार्टीको जिम्मेबार निकायबाट न्यायपूर्ण निर्णयको प्रयत्न गर्दा गर्दै पनि पार्टीबाट पर्याप्त अवसर पाएका तथा अवसरको नजिक रहेका कतिपय सदस्यहरु मूलधारबाट बाहिर रहन हुन्न भन्ने मान्यताका साथ भाद्र ९ का नेपाली कांग्रेस तनहुँको बैठकले मूलधारमा समाहित हुन आह्वान भएको जनाइएको छ ।
विज्ञप्तीमा व्यक्तिले गरेका त्रुटीका कारण कांग्रेसको सिद्धान्त, आदर्श र मान्यता कमजोर नभएको बरु व्यक्ति नै किनारा लागेको इतिहास भएका स्मरण गराइएको छ ।