घरेलु मैदानको फाइदा उठाउँदै दोस्रो नेपाल
दुइ वर्षपछि पाकिस्तानको इस्लामावादमा हुने १४औैं सागमा भेट्ने वाचासहित १३औं दक्षिण एशियाली खेलकुद(साग) मंगलबार दशरथ रङ्गशालामा उल्लासका साथ समापन भएको छ । लोकप्रिय खेल फुटबलमा स्वर्ण पदक जितेकाले पनि नेपालका लागि साग महत्वपूर्ण र उल्लासमय बन्न पुगेको हो ।
नेपालले यस पटकको सागमा ५० स्वर्ण जित्ने लक्ष्य राखेकोमा ५१ स्वर्ण सहित पदक तालिकामा आफुलाई दोस्रो स्थानमा राख्न सफल भयो, जुन उत्साह थप्ने कारक बन्न पुग्यो । कुल तीनसय १६ स्वर्णका लागि भएको सागमा नेपाल ५१ स्वर्ण सहित दोस्रो भएको हो । प्रतियोगितामा भारत एकसय ७४ स्वर्ण सहित पहिलो भयो भने भुटानले कुनै पनि स्वर्ण जित्न सकेन । यस अघि नेपालले सन् १९९९ मा नेपालमा आयोजित साफ गेममा ३१ स्वर्ण जितेको थियो । भारतमा आयोजित १२ औं सागमा पुरुष फुटबलको स्वर्ण विजेता नेपालका लागि १३ औं साग पनि उल्लासमय हुनमा उक्त स्वर्ण फेरी हात लाग्नु पनि हो । मंगलबारको अन्तिम खेलमा नेपालले भुटानलाई २–१ गोल अन्तरले हराउँदै पुरुष फुटबल तर्फको स्वर्ण जितेको हो । १३औं सागमा नेपाली पौडी खेलाडी गौरिका सिंहले एकै संस्करणमा चार स्वर्ण जितेर नयाँ कीर्तिमान रचिन् । उनले दुई रजत र तीन कांस्यपदक नेपाललाई दिलाइन् ।
१२ आंै सागका उल्लेख गर्नुपर्ने पक्ष रहे । खेलकुद पदाधिकारी र मन्त्री तथा प्रदेश मुख्यमन्त्रीहरुको भागमा निःशुल्क कुर्ता सुरवाल पर्दा खेलाडीले पाएनन् । ट्रायथलनकी खेलाडी सोनी गुरुङले खेलमा सहभागीताका लागि आवश्यक साइकल नपाउँदा आफ्नै पुरानो साइकलले काम चलाइन तर स्वर्ण हात पारिन् । आवश्यक खेल सामग्री नपाउने सोनी मात्र थिइनन्, अरु धेरै थिए तर सबै खेलाडीले मन फराकिलो बनाएर खेले र कुल दुइसय छ पदक सहित नेपाललाई दोस्रो स्थानमा राख्न सफल भए । यो खेलमा महिला खेलाडीहरुको सहभागिता र पदक प्राप्ती उल्लेख्य रह्यो ।
पोखरा र जनकपुरका दर्शकले समेत देश तथा विदेशका खेलाडीको खेल हेर्ने मौका पाए । तर अन्तिम दिनको फुटबल फाइनल खेल हेर्न गएका दर्शकमाथि प्रहरीको ज्यादती र पत्रकारमाथि भएको प्रहरी ज्यादतीपनि चर्चामा रहे ।