व्यास नगरपालिका भित्रका विद्यालयहरुको शैक्षिक सुधारका लागि गत साता व्यास नगरपालिकाले ३९ वुँदा सम्मिलित ‘यसो गरौं’ शिर्षक आवाह्न पत्र जारि गरेको छ । नगरपालिकाको शिक्षा, युवा तथा खेलकुद शाखाले तयार पारेर कार्यान्वयनका लागि नपा भित्रका सबै विद्यालयमा पठाइएको आवाह्न पत्रमा नपालाई शैक्षिक गन्तब्य बनाउन बिद्यालय र सरोकारवाला पक्षहरुले सम्पादन गर्नुपर्ने कार्यहरु उल्लेख गरीएको छ । सामुदायीक विद्यालयहरुको खस्कदो शैक्षिक स्तरमा सुधार ल्याउन नगरपालिकाले गरेको यो कार्य सकारात्मक छ । यसको प्रभावकारी कार्यान्वयनले नपाले भनेझैं शैक्षिक सुधार हुनेछ । आवाह्न पत्रमा उल्लेखित बुँदाहरु कार्यान्वयनमा कठिनाइ हुने खालका छैनन् । तर, कार्यान्वयनमा सरोकारवालाहरुको कति प्रतिवद्धता रहन्छ भन्ने चाहि महत्वपूर्ण हुन आउछ । यस अघि पनि विद्यालय क्षत्र सुधार तथा शैक्षिक सुधारका लागि सरकारीतवरबाट अनेकौं प्रयत्नहरु नभएका होइनन् । तर तिनको प्रभावकारी कार्यान्वयन नहुँदा अपेक्षित नतिजा आउन नसकेको अनुभव हामीसँग छ ।
माथीनै भनियो, यो आवाह्न नगरपालिकाको सकारात्मक काम हो । यति गर्दैमा नगरपालिकाले हामीले प्रयत्न गरेका हौं तर अपेक्षित शैक्षिक सुधार भएन भनेर उम्कन भने पाउँदैन, आवाह्नको कार्यान्वयन भए–नभएको अनुगमन गर्ने, कार्यान्वयन गर्ने विद्यालयलाई प्रोेत्साहन गर्ने र कार्यान्वयनमा नल्याउनेलाई ल्याउन प्रेरित गर्ने कार्य भने नपाले गरिरहनुपर्छ । यसका लागि सक्रिय अनुगमनकारी निकायको आवश्यकता पर्दछ । प्रभावकारी अनुगमन नहुँदा अपेक्षित नतिजा प्राप्त हुँदैन ।
नगरपालिकालाई साच्चै शैक्षिक गन्तब्य बनाउने हो भने प्रभावकारी अनुगमन निकाय निर्माण गरी आवाह्नको कार्यान्वयन भए–नभएको अनुगमन गर्नु गरुरी छ । आशा गरौं, नगरपालिकाले यसतर्फ पनि सोच्ने र कार्यान्वयन गर्ने छ ।