दिपेशले दिलाए अग्रता

समुन्द्र ढकाल
पल्सर शहीद स्मारक ए डिभिजन लिग अन्र्तगत मंगलबार सिएमजी क्लब संकटाले नेपाल पुलिस क्लबलाई २–१ ले पराजित गरेको छ । संकटाको जितमा सरोज दाहाल र दिपेश आले मगरले गोल गरे ।

संकटाले खेलमा सुरुवाती अग्रता लियो । खेलको २९ औ मितेटमा सरोज दाहालले लक्ष्मण रुचालका कर्नरमा गोल गर्दै संकटालाई अगाडि बढाए । ३६ औ मिनेटमा संकटाले अग्रता दोब्बर पा¥यो । तेज तामाङ र दिनेश राजबंशीबीच मैदानको बीच भागमा समन्वय नमिल्दा नितिन थापा मगरले बल खोस्दै एलोन म्याक्सवेललाई दिए । एलोनले दिएको थु्रबलमा तनहूँका दिपेश आले मगरले गोल रक्षक शत्रधन चौधरीलाई समेत छल्याउँदै गोल गरेर संकटालाई २–० अग्रता दिलाए । पुलिसले त्यसको एक मिनेटमै गोल गरेर अग्रता कम ग¥यो । अभिषेक रिजालको पासमा रवि पासवानले पेनाल्टी क्षेत्रभित्रबाट गोल गर्दै २–१ को स्थितीमा ल्याए । दोस्रो हाफमा दुबै टोलीले अवसर सृजना गरे पनि त्यसको सदुपयोग गर्न सकेनन् ।

संकटा लिगमा पाचौं जित दर्ता गर्दै ६ खेलमा १५ अंक जोडन सफल भएको छ । संकटा र शिर्षस्थानको मनाङ मस्र्याङ्दीको अंक बराबरी रहेको छ । गोल अन्तरमा संकटा दोस्रो स्थानमा छ । पुलिस भने ६ खेलमा ३ जित १ बराबर र २ हार संगै १० अंकमा रहेको छ ।