दमौली/राष्ट्रिय परीक्षा बोर्डको अध्यक्षका लागि तनहुँका डा.रामचन्द्र पाण्डेले र लक्ष्मीराम पौडेलले आवेदन दिएका छन् । हालका अध्यक्ष महाश्रम शर्माको ४ वर्षे कार्यकाल सकिएपछि सरकारले बोर्डको अध्यक्षका लागि आवेदन आह्वान गरेको थियो ।
सरकारले बोर्डको अध्यक्ष नियुक्त गर्न लोकसेवा आयोगका अध्यक्ष माधवप्रसाद रेग्मीको अध्यक्षतामा सिफारिस समिति गठन गरेको छ । समितिका अनुसार पाण्डे र पौडेल सहित १३ जनाले बोर्ड अध्यक्षका लागि आवेदन दिएका छन् ।
लामो समय शिक्षा क्षेत्रमा रहेर काम गरेका व्यास–१२, कमलबारीका पाण्डेले २४ वर्ष उच्च माध्यमिक शिक्षा परिषद्मा रहेर काम गरे । मदन भण्डारी स्मृति प्रतिष्ठानको प्रमुख कार्यकारीको रुपमा काम गरेको समेत अनुभव संगालेका पाण्डे पाठ्यक्रम विद्को रुपमा समेत चिनिन्छन् ।
शुक्लागण्डकीका स्थायी वासिन्दा पौडेल नेपालको शिक्षा प्रशासन क्षेत्रका अनुभवी र परिचित व्यक्ति हुन् । राष्ट्रिय परीक्षा बार्डको सदस्य सचिव भएर काम गरेको अनुभव पनि पौडेलसँग छ । शिक्षा, विज्ञान तथा प्रविधि मन्त्रालय अन्तर्गतका विभिन्न विभाग र निकायहरूमा बसेर नीति निर्माण र कार्यान्वयनमा योगदान गरेका पौडेलले जिल्ला शिक्षा कार्यालय तनहुँको जिल्ला शिक्षा अधिकारीका रुपमा रहेर काम गरेका थिए ।
आवेदकहरुबाट संक्षिप्त सूची प्रकाशित गरी बाँकी प्रक्रिया अघि बढाउने समितिले जनाएको छ ।
देवकुमारी गुरागाईं र रामेश्वर अधिकारी सदस्य रहेको सिफारिस समितिले आवेदकहरुको अवधारणा पत्र, व्यावसायिक कार्ययोजना, त्यसको प्रस्तुतीकरण मूल्यांकनसहित अन्तर्वार्ताबाट नियुक्तिको सिफारिस गर्नेछ ।