दमौल/राष्ट्रपति शैक्षिक सुधार कार्यक्रम कार्यान्वयनका लागि तनहुँका ४८ विद्यालय छनौटमा परेका छन् । शिक्षा तथा मानव विकास श्रोत केन्द्रले फागुन ३ मा जारी गरेको सूचनामा तनहुँका १० स्थानीय निकायका जम्मा ४८ विद्यालय छनौटमा परेको जनाएको हो ।
केन्द्रको सूचना अनुसार राष्ट्रपति शैक्षिक सुधार कार्यक्रम कार्यान्वयन कार्यविधि २०७६ मा रहेको व्यवस्था बमोजिम देश भरका७५३ स्थानीय निकायका चार हजार १७२ विद्यालय छनौटमा परेका हुन् ।
तनहुँका १० स्थानीय निकाय मध्ये भीमादका ६ , बन्दीपुरका ५, भानुका ५, व्यासका ८, म्याग्देका ३, आबुँखैरेनीका ४, ऋषिङका ४, शुक्लागण्डकीका ५, घिरिङका ४ तथा देवघाट गाउँ पालिकाका ४ गरी ४८ विद्यालय छनौटमा परेको केन्द्रले जनाएको छ । केन्द्रका अनुसार भीमादका २ तथा भानुका २ विद्यालय तथा अन्य पालिकाका १÷१ विद्यालय गरी जम्मा १२ वटा विद्यालयले चारकोठे भवन निर्माणका लागि प्रति विद्यालय ३६ लाखका दरले अनुदान प्राप्त गर्नेछन् ।
यसैगरी १० वटा विद्यालयले २ कोठे भवन निर्माणका लागि प्रति विद्यालय १८ लाख प्राप्त गर्ने छन् । आँबु खैरेनीको रामशाह मावि ल्याब स्थापनाका लागि छनौटमा परेको छ भने बाँकी २५ विद्यालय सूचना तथा सञ्चार प्रविधिको विकास कार्यक्रमका लागि छनौटमा परेका छन् ।
ल्याव स्थापनाका लागि छनौटमा परेको विद्यालयले १० लाख रुपैयाँ पाउने छ भने सूचना तथा सञ्चार प्रविधि विकासका लागि छनौटमा परेको विद्यालयले ६ लाख ५० हजार रुपैयाँ पाउने छन् ।
छनौटमा पर्नेमा ७ वटा आधारभूत तहका विद्यालय तथा ४१ माध्यमिक विद्यालय रहेका छन् ।
कार्यक्रम अन्तर्गत तनहुँमा शैक्षिक सुधारका लागि सात करोड ८४ लाख ७५ हजार रुपैयाँ भित्रिने छ ।
