शुभकामना आदान प्रदान

पोखरीछाप/भानु नगरपालिका वडा नं. १३ को पोखरीछापमा मंगलबार हरितालिका तीज पावन अवसरमा शुभकामना आदान प्रदान कार्यक्रम सम्पन्न भएको छ । पोखरीछापबाट सम्वाददाता बाबुराम खनालले दिनुभएको जानकारी अनुसार हिन्दु नारीहरुले बडो महत्वका साथ मनाउने हरितालिका तीज पर्वको अवसरमा महिला सञ्जाल भानु १३ ले शुभकामना आदान प्रदानको आयोजना गरेको थियो । नेपाल महिला संघ सतिस्वाँरा गाउँपालिकाकी पूर्व सभापति विष्णुमायाँ थापाको प्रमुख आतिथ्यतामा सम्पन्न सो कार्यक्रममा वडाध्यक्ष रामबहादुर बानियाले विशेष सम्वोधन गर्नुभएको थियो । कार्यक्रमका वक्ताहरुले सांस्कृतिक तीज पर्वको मौलिकता हराउँदै गएको अवस्थाप्रति चिन्ता व्यक्त गरेका थिए । उनिहरुले भड्किलो र खर्चिलो बनाउन नहुनेमा जोड दिएका थिए । साथै वक्ताहरुले सामाजिक पर्वहरुले नेपाली सस्कृतिको संरक्षण र सामाजिक सद्भाव बढाउन तर्फ विेशष ध्यान दिनुपर्ने जोड दिएका थिए । तीजमा गाईने गीतहरु सिर्जनशिल र सामाजिक सद्भाव बढाउने खालको रचना गर्न सुझाइएको थियो । सो कार्यक्रम महिला सञ्जाल वडा नं. १३ की अध्यक्ष सिता पौडेलको सभापतित्वमा भएको थियो ।