हार्ट स्क्रिनिङ क्याम्प हुने

दमौली/नेपाल हृदय रोग निवारण प्रतिष्ठान तनहुँ शाखाको अयोजनामा दमौलीमा हार्ट स्क्रिनिङ क्याम्प सञ्चालन हुने भएको छ ।
शाखा सभापति कृष्णचन्द्र पाण्डेका अनुसार माघ २९मा दमौली स्थित सत्यवती माध्यमिक विद्यालयमा सञ्चालन हुने क्याम्पमा तीन हजार बाल बालिकाको हार्ट स्क्रिनिङ गर्ने उद्देश्य रहेको छ । क्याम्प सञ्चालनका लागि बरिष्ठ मुटु रोग विशेषज्ञ डा.प्रकाशराज रेग्मीको नेतृत्वमा पाँचजना मुटुरोग विशेषज्ञ तथा कर्मचारी गरी १४ जनाको समूह दमौली आउने सभापति पाण्डेले जनाकारी दिए ।
नेपाल हृदयरोग निवारण प्रतिष्ठान केन्द्रको सहयोगमा सञ्चालन हुने क्याम्पमा विद्यालय उमेर समूहका बालबालिकाको मुटु परिक्षण गरिने छ । क्याम्पमा स्क्रिनिङका क्रममा मुटुमा समस्या देखिएमा निःशुक्ल उपचारको व्यवस्था गरिने समेत शाखा उपसभापति चुडामणी दाहालले बताए ।