नसोचेको सफलता, सफलताले दिएको अवसर र अवसरले लिने परीक्षामा रास्वपा

रमेश विकल
राष्ट्रिय स्वतन्त्र पार्टी फागुन २१ मा सम्पन्न निर्वाचनबाट देशको सबैभन्दा ठूलो दल बनेको छ । दोस्रो ठूलो दलभन्दा प्रतिनिधि सभा सदस्य संख्याको हिसाबले धेरै नै ठूलो बनेको रास्वपा सामान्य बहुमतमा मात्र छैन बरु दुइतिहाईको एकदम नजिक पुगेको छ ।

“अब कि बार बालेन सरकार” भन्ने नारा बनाएर निर्वाचनमा होमिएको रास्वपाको आन्तरिक अध्ययनले पनि यति धेरै स्थानमा विजय हासिल गर्ने र समानुपातिक मत पाउने कुरा उल्लेख नभएको समाचार बाहिरिएका थिए । तर उसले प्रत्यक्ष तर्फ खसेको कुल सदर मत एक करोड पाँच लाख ५९ हजार १७ मत मध्ये ४६ लाख ५० हजार ६९७ अर्थात ४४ प्रतिशत मत प्राप्त ग¥यो र १६५ मध्ये १२५ स्थानमा विजय हासिल ग¥यो । उता समानुपातिक तर्फको एक करोड आठ लाख ३५ हजार २५ सदर मत मध्ये रास्वपाले ५१ लाख ८३ हजार ४९३ अर्थात झण्डै ४८ प्रतिशत मत प्राप्त ग¥यो ।
निर्वाचन ताका रास्वपा, जे छोएपनि सुन बन्ने बरदान पाएका युनानी राज मिदास जस्तो भएको थियो । तर त्यही बरदान उनको मृत्युको कारण बनेको थियो । अघिल्लो दिनसम्म कांग्रेस, एमाले वा नेकपामा भएका र भ्रष्ट, अवसरवादी, दलाल,
झोले, नालायक भनेर सत्तोसराप गरिने व्यक्ति रास्वपामा प्रवेश गर्ने विक्तिकै सदाचारी, योग्य, नायक, सर्वज्ञाता, विद्धान, दार्शनिक र सादगी भए । कांग्रेस, एमालेमा हुँदाका रत्नाकरहरु घण्टी समाएपछि तत्क्षण वाल्मिकी भनाइए । सुनपानी छर्केर शुद्ध भनियो ।
रास्वपा अहिले हावाले भरिएर आकाशमा उँड्दै गरेको बेलुन जस्तो भएको छ । उसले उचाइ लिँदै गर्दा हेरेर रमाउनेहरु धेरै छन् । तर आम मानिसमा आशंका पनि छ, आकाशको धेरै उचाइमा पुगेपछि फुट्ने बेलुनको नियती रास्वपाको हुने त होइन ? भनिन्छ, अनपेक्षित सफलताले अहंकारको विस्तार गर्छ र मानिसमा “मलाई कसैले केही गर्न सक्दैन” भन्ने भ्रम पैदा गर्छ र यो भ्रमले गलत निर्णय गर्न उत्प्रेरित गर्छ । र गलत निर्णयले क्षय । रुखमा जति धेरै फल लाग्छ, त्यति धेरै रुखका हाँगाहरु झुक्ने गर्छन्, त्यस्तै सफलताले रास्वपालाई विनयी बनायो भने जनताको यो अपार विश्वास कायम रहन्छ ।
भनिरहुन परेन पुराना दलहरु प्रतिको वितृष्णाले रास्वपालाई सफलताको सिँढी चढ्ने बाटो खाली गरिदिएको
थियो । सिँढीमा कुनै अवरोधहरु थिएनन् उ अहिले सफलताको शिखरमा छ । हामी बाहेक अरु सबै खराब भन्ने भाष्य निर्माण गरेर प्राप्त जनसमर्थनलाई कायम राख्न रास्वपाले आगामी दिनमा इमान्दार प्रयत्नु गर्नुपर्ने छ । जनताले हामीलाई मात्र पत्याएका हुन् भन्ने अहमं पाल्न थालेको दिन फेरी उल्टो गन्ती सुरु हुनेछ ।
झण्डै ५० प्रतिशत नागरिकको समर्थन रुपि सफलताले रास्वपालाई राम्रो अवसर प्रदान गरेको छ । थिती बसाल्ने वाचा गरेको रास्वपालाई आमूल परिवर्तनको सफल नेतृत्व गर्ने र देशलाई सुशासन र समृद्धिको मार्गमा लैजाने अवसर प्राप्त भएको छ । प्रधानमन्त्री बन्दै गरेका बालेन शाह, मन्त्री बन्नेहरु र सांसदहरुले सम्झनु पर्छ, नसोचेको सफलताले अवसर मात्र होइन, कठिन परीक्षा पनि लिएर आउँछ । त्यसैले विनयी बन्दै पुराना सबै खराब थिएनन् भन्ने सत्य स्वीकारेर उनीहरुसँगबाट सिक्दै देश र नागरिकको अपेक्षा पूरा गर्नु रास्वपाको दायित्व हो ।
अर्काे सत्यपनि रास्वपा र यसका समर्थकले बुझ्नु र आत्मसात गर्नुपर्ने छ, त्यो हो सुनपानी छर्केर शुद्ध भएको भन्न सकिन्छ तर शरिरमा भएका मयालजन्य विकार भने गएको हुँदैन । सफा भएको हुँदैन । कुनै रत्नाकर रातारात वाल्मिकी बन्दैन/बन्न सक्दैन । परिस्थितिलाई दोष दिएर आफ्ना कमजोरी र असफलता ढाकछोप गर्ने छुट रास्वपालाई छैन । रास्वपालाई असफल हुने छुट छैन । यदि यसो भएमा आफ्नो छनौटका प्रति नेपाली नागरिकलाई पछुतो हुनेछ । र अन्ततः रास्वपालाई नै घाटा हुनेछ ।