नक्कली भुटानी शरणार्थी बनाएर विभिन्न देशहरुमा पुर्नवासका लागि पठाउने कार्यमा संलग्नहरु समातिन थालेका छन् ।
नक्कली शरणार्थी बनाएर नेपालीलाई अमेरिका, बेलायत,अष्ट्रेलिया, क्यानडा, न्यूजिल्याण्ड, नर्वे, डेनमार्क र नेदरल्याण्ड जस्ता देशहरु पठाउने र त्यस बापत प्रतिव्यक्ति १५ देखि ४० लाखसम्म असुल्ने योजना सहित झण्डै हजार नागरिकबाट अर्बाैँ रकम उठाइएको कुरासंगै त्यसमा संलग्न मानिसहरुको नाम सुन्दा जिब्रो टोक्नु पर्ने खालको छ । कांग्रेस सभापति शेरबहादुर देउवा पत्नी तथा कांग्रेसबाट समानुपातिक सांसद आरजु राणाको यसमा संलग्नता रहेको भन्ने कुराले हाम्रो राजनैतिक नेतृत्व कतिसम्म भ्रष्ट छ भन्ने देखाएको छ ।
कांग्रेस नेता बालकृष्ण खाँड बुधबार पक्राउ परेका छन् भने उनकी पत्नी मञ्जु खाँडको नाम पनि त्यसमा समावेश छ । एमालेका सचिव टोपबहादुर रायमाझीलाई त अदालतले पक्राउ पुर्जी नै जारी गरिसकेको छ । यो लेख तयार पार्दासम्म पूर्व गृहसचिव टेकनारायण पाण्डे, पूर्व गृहमन्त्री रामबहादुर थापाका सुरक्षा सल्लाहकार इन्द्रजित राई, केशव दुलाल, सानु भण्डारी, सागर राई, सन्देश शर्मा, टंककुमार गुरूङ र एमाले सचिव रायमाझीका छोरा सन्दीप रायमाझी तथा रामशरण केसी र गोविन्द चौधरी तथा खांडका सहयोगी नरेन्द्र केसी पक्राउ परिसकेका छन् । पूर्व गृहमन्त्री रामबहादुर थापालाई पनि प्रहरी निगरानीमा रहेको समाचार आएका छन् ।
आफै गिरफ्तारी दिएर कानुन कार्यान्वयनमा सघाउने बताएका रायमाझी बेपत्ता छन् । रायमाझी भागेर कतै नजाने बताउने एमाले अध्यक्ष केपी ओली अब प्रश्नकर्तालाई तपाईँहरु आफै खोज्नुस भनेर ओठे जवाफ फर्काउन थालेका छन् । त्यस्तो गम्भीर अपराधमा मुछिएका नेताको अनेक विषयान्तर गर्दै एमाले नेता कार्यकर्ता बचाउमा लागेका छन् । कांग्रेस नेताहरुको अहिलेसम्म सकारात्मक जवाफ आएको भएपनि उच्च तहका नेताको संलग्नता भटिएको हल्लासंगै बोली फेरिने हो कि भन्ने आम आशंका छ ।
उता आफुलाई सबैभन्दा ठूलो भ्रष्टाचार विरोधी भनेर चिनाउन चाहने र सोही नाराले जन्मको ६ महिनामै देशव्यापी राम्रै जनमत बनाएको राष्ट्रिय स्वतन्त्र पार्टी सरकारले भ्रष्टाचारीलाई कारवाही प्रक्रिया थालेको थाहा पाएकै दिन सरकारलाई दिएको समर्थन फिर्ता लिने निर्णयमा पुगेको छ । यो संयोगमात्र हो या योजनाबद्ध त्यो त समयले बताउला तर दुइ करोडको अडियो काण्डमा आफ्नो सांसदको संसद सदस्य समेत नरहेन गरी कारवाही गरेर जनसमर्थन बटुलेको रास्वपामाथि शंका गर्ने ठाउँ भन्ने प्रसस्त भएको छ । किनभने विधि नुपु¥याई गरिएको कारवाहीले ढाकाकुमार अदालतको आदेशमा फेरी संसद भवन छिर्ने सम्भावना देखिएको छ ।
आफ्ना माथिल्ला तहका नेता यो प्रकरणमा मुछिएपछि कांग्रेस, एमाले र माओवादीका ठूला भनिएका नेताहरुको भेटघाट बाक्लिएको छ । र आम आशंका छ, मिलिजुली यी नेताहरुले आफ्ना नेता कार्यकर्ता बचाउने छन् । तर कांग्रेस, एमाले तथा माओवादी लगाएत दलका नेताले बुझ्नु पर्ने तथ्य के हो भने अब आम मानिसले नेताहरुको भ्रष्टहरुलाइ बचाउने प्रयास सफल हुन दिने छैनन । अनि अर्काे सत्य आगामी निर्वाचनमा यी दलहरुको हविगत प्रजा परिषदको जस्तै हुनेछ ।