छिट्टै मुक्त हुँदै तनहुँका तीन पालिका
दमौली/सरकारको सन् २०२५ सम्ममा देशलाई क्षयरोग मुक्त बनाउने लक्ष्य पूरा गर्न तनहुँका तीन पालिकामा कार्य आरम्भ भएको छ ।
प्रदेश जनस्वास्थ्य कार्यालय तनहुँका अनुसार तनहुँको भानु नगरपालिका, व्यास नगर पालिका तथा म्याग्दे गाउँ पालिकालाई क्षयरोग मुक्त बनाउने अभियान प्रारम्भ भएको छ । सोमबार कार्यलयमा आयोजित पत्रकार अन्तरक्रिया कार्यक्रममा दिइएको जानकारी अनुसार अभियान सञ्चालन हुने पालिकाहरुमा परीक्षणको दायरा बढाइएको छ । उपचारका पहुँच बाहिर रहेका विरामीलाई पहुँचमा ल्याउने कार्यक्रमहरु समेत सञ्चालन गरिने छन् । यसका साथै जनचेतनामूलक कार्यक्रमहरु समेत सञ्चालन हुने कार्यालयले जनाएको छ ।
विश्व क्षयरोग दिवसको अवसर पारेर आयोजित अन्तरक्रियाका अवसरमा तनहुँका विभिन्न पालिकामा भएको क्षयरोगीको संख्या बारे समेत जानकारी गराइएको थियो । प्रदेश जनस्वास्थ्य कार्यालय तनहुँका ल्याब टेक्निसियन दिपक श्रेष्ठका अनुसार व्यासमा ५३, शुक्लागण्डकीमा २३, भानुमा ११ ,भिमादमा ६, म्याग्देमा ११, बन्दीपुरमा १९, आँबुखैरेनीमा २०, देवघाटमा १५, ऋषिङ गाउँपालिकामा ७ र घिरिङमा १४ जना क्षयरोगका बिरामी रहेका छन् । टेक्निसियन श्रेष्ठले चालु आवको चैत्र १० सम्ममा नयाँ १७९ जना क्षयरोगका विरामी देखिएको तथा सोही अवधिमा १५ जनाको मृत्यु भएको जानकारी गराए ।
समयमै रोग पत्ता लागेर नियमित औषधी उपचार गरेमा क्षयरोग निको हुने जानकारी गराउँदै श्रेष्ठले तनहुँमा क्षयरोग निको हुने दर ८७ दशमलव ५ प्रतिशत रहेको बताए । क्षयरोगीको उपचारका लागि तनहुँमा एक सय ११ वटा उपचार केन्द्र रहेका छन् ।कुपोषण भएका बालबालिका, ज्येष्ठ नागरिक, समूहमा बस्नेहरुमा क्षयरोगको सङ्क्रमण बढी हुने गर्दछ । क्षयरोगीको पहिचान गरी उपचारको पहुँचमा ल्याउने कुरा तथा रोग लुकाएर राख्ने प्रवृत्ति क्षयरोग निवारणमा चुनौतिका रुपमा रहेका छन् ।