हङकङ समाजको झण्डै चार लाख सहयोग

दमौली/तनहुँ समाज हङकङले एक ब्लड क्यान्सर पीडित महिलालाई तीन लाख ७५ हजार रुपयाँ उपचार खर्च प्रदान गरेको छ ।
तनहुँको भानु–१३ पोखरीछाप निवासी ५२ वर्षीया क्यान्सर पीडित जमुना गुरुङलाई सोमबार दमौलीमा समाजका पूर्व अध्यक्षहरु जंग थापा र भीमराज गुरुङले संयुक्त रुपमा सो रकम प्रदान गर्नुभयो ।
विगत एक वर्षदेखि क्यान्सरबाट ग्रसित भइ उपचारको क्रममा रहेकी गुरुङलाई ५७ जना तनहुँङ्गेबाट संकलन गरिएको थियो । तनहुँ समाज हङकङले हालसम्म ८ जना मृगौला पीडित, एक जना मुटु रोगी, करेण्ट लागेर हात गुमाएका एक जनालाई र एक जना क्यान्सर पीडितलाई गरि लाखौं सहयोग गरिसकेको भिम गुरुङ्गले बताउनु भयो ।
यस अघि विभिन्न प्राकृतिक प्रकोपबाट पीडित भएकाहरुलाई पनि समाजले सहयोग गर्दै आएको छ । ०७२ सालको भुकम्प पश्चात जिल्ला विपत् कोषलाई ३ लाख ५० हजार र २४ वटा विद्यालयलाई जस्तापाता तथा नगद गरि १२ लाख भन्दा बढी आर्थिक सहयोग गरेको थियो । त्यस्तै ऋषिङका पहिरो पीडित परिवारलाई २ लाख ६४ हजार आर्थिक सहयोग गरेको बताइएको छ ।
समाजले जिल्लाको शिक्षा, स्वास्थ्य र खानेपानीको क्षेत्रमा पनि ठुलो आर्थिक सहयोग गर्दै आएको छ । भिमाद–४, साराडाँडा स्थित खानेपानी आयोजनालाई ३ लाख ८७ हजार, शुक्लागण्डकी नगरपालिका थप्रेकमा खानेपानीलाई ३ लाख र क्यामिन कोटथोकमा खानेपानी आयोजनालाई ५ लाख आर्थिक सहयोग गरेको समाजका पूर्व अध्यक्ष गुरुङले बताए ।
समाजले कोभिड संक्रमणका बेला तनहुँका १० वटै स्थानीय तहलाई नगद रु १५÷१५ हजार र व्यास नगर कोभिड अस्पताललाई २ लाख सहयोग गरेको थियो ।
भानु जन्मस्थलमा तनहुँ समाज हङकङ पुस्कालय निर्माणमा पनि आर्थिक सहयोग गरेको बताईएको छ ।
५ लाख, प्रत्येक वर्ष तनहुँका १० वटा विद्यालयमा अध्ययनरत बहु आपंगता भएका बालबालिकालाई निरन्तर ७ वर्षदेखि सहयोग गरेको पनि समाजले जानकारी दियो ।
कोभिडका कारण केही वर्ष रोकिएको उक्त कार्यक्रम यसै वर्षबाट सुरु हुने समाजका कार्यक्रम संयोजक प्रदीप काफ्लेले जानकारी दिए । साथै यस वर्षबाट भानुको पुर्कोट स्थित चण्डिका बाल गृहलाई पनि सहयोग गर्ने योजना बनाइएको उनले बताए ।
समाजले तनहुँ समाज हङकङ युवा पत्रकारिता पुस्कार स्थापना गरी प्रत्येक वर्ष जिल्लामा क्रियाशिल २ जना पत्रकारलाई सम्मान पनि गर्दै आएको छ भने नेपाल पत्रकार महासंघको भवन निर्माणका लागि पनि ७० हजार सहयोग गरेको काफ्लेले जानकारी दिए ।
बिगत १० वर्ष देखि जिल्लाको विभिन्न क्षेत्रमा सघाउदै आएको समाजले पहिलो पटक तनहुँका प्रसिद्ध धार्मिक स्थल छाब्दी बाराही र ढोर बाराहीमा एक एक थान घण्टी हस्तान्तरण गरेको थियो ।