व्यास/प्रधानमन्त्री रोजगार कार्यक्रम अन्तरगत व्यास नगरपालिकाले ८७ जनालाई रोजगारी उपलब्ध गराएको छ । प्रधानमन्त्री रोजगार कार्यक्रम मार्फत दैनिक छ सय १६ ज्याला पाउन थालेपछि ८७ जना बेरोजगारको दैनिकी सहज र सुखद बन्दै गएको लाभान्वित रोजगारको धारणा रहेको छ । न्यूनतम एक सय दिनको रोजगारीको सुनिश्चिता संगसंगै थप कार्यदिन बढ्नेमा रोजगार पाउनेहरु आशावादी रहेको व्यास–६ की रोजीना सुनार बताउँछिन् । व्यास नगरपालिकाले बेरोजगारलाई रोजगारीसंगसंगै विकास निर्माणलाई पनि अगाडि बढाएको नगरप्रमुख बैकुण्ठ न्यौपाने बताउनु हुन्छ । प्रधानमन्त्री रोजगार कार्यक्रम संयोजक सुचिता थापाको बुझाईमा रोजगार कार्यक्रमले विपन्न र बेरोजगारको जीवनस्तरमा सुधार आएको छ । दैनिकीमा राहत भएको छ । चालू आर्थिक वर्षमा मात्रै व्यास नगरपालिकामा ३ सय ५७ जना प्रधानमन्त्री रोजगार कार्यक्रममा सुचिकृत भएका थिए जसमा अहिले ८७ जना मात्र रोजगारी गर्ने अवसर पाएका हुन् ।