अैरीचौतारी/नेपाल रेडक्रस सोसाईटी तनहुँ शाखाले बाढी पैरो प्रभावित ऋषिङ्ग क्षेत्रको स्थलगत अवलोकन गरी ऋषिङका बाढी पहिरो प्रभावित २२ घर परिवारलाई तत्काल उपलब्ध हुने अखाद्य राहत सामाग्री उपलब्ध गराएको छ । रेडक्रस तनहुँ शाखाका सभापति कृष्णहरि वाग्ले, उपसभापति ऋषिराम पोख्रेल, ऋषिङ्ग उपशाखाका सभापति रमेशकुमार श्रेष्ठ, सदस्य भरतकुमार श्रेष्ठ, वडाध्यक्ष भविसरा आले समेतको टोलीले मझकोटका पहिरो प्रभावित खुमबहादुर आलेको परिवारलाई क्रियाकर्ममा बसेको घरमै पुगेर भेटी सान्त्वना दिई तत्कालको राहत उपलब्ध गराएको थियो । रेडक्रसको टोलीले ऋषिङ्ग–८, टुहुरे खोल्सी (वालापुर) को पहिरो, रानीपोखरी भतुवा खोल्सी लिफ्टिङ्ग खानेपानीलाई प्रभावित पारेको पहिरो, अझम्बरी मन्दिर क्षेत्रलाई प्रभावित पार्ने पहिरो समेतका पहिरोको अवलोकन गरेको थियो ।