दमौली/नेपाल रेडक्रस सोसाईटी तनहुँ शाखाले आफ्नो ३९औ साधारण सभा सम्पन्न गरेको छ । अधिवेशन बर्ष भएतापनि मतदाता नामावली प्रमाणित गर्न र केन्द्रिय प्रतिनिधि खटाउन नेपाल रेडक्रस सोसाईटी केन्द्रिय समितिको वैधानिकताको प्रश्न समाधान नभएको कारण अधिवेशन हुन नसकेतापनि वैधानिक अस्तित्वका लागि शाखाले आफ्नो साधारण सभा सम्पन्न गरेको हो । शाखाले आफ्नो ३९औं साधारण सभामा स्थानीय सरकारका प्रमुख उपप्रमुखलाई आमन्त्रण गरेर सम्मान समेत गरेको छ ।
शाखाले तनहुँका जिल्ला समन्वय प्रमुख, उपप्रमुख, नगरपालिका प्रमुख, उपप्रमुख, गाउँपालिका प्रमुख, उपप्रमुख सबैलाई आमन्त्रण गरेको थियो । कार्यव्यवस्थताका बावजुद नेपाल रेडक्रस सोसाईटी तनहूँ शाखाको आमन्त्रणलाई स्वीकार गरेर जिल्ला समन्वय समिति तनहुँका प्रमुख शान्तिरमण वाग्ले, भिमाद नगरपालिकाका प्रमुख दधिराज सुवेदी, भानु नगरपालिकाका प्रमुख आनन्द त्रिपाठी, घिरिङ्ग गाउँपालिकाका प्रमुख होमबहादुर थापा, व्यास नगरपालिकाको उपप्रमुख इन्दिरा दरै, भानु नगरपालिकाको उपप्रमुख, बन्दिपुर गाउँपालिकाको उपप्रमुख, ऋषिङ्ग गाउँपालिकाको उपप्रमुख लगायतले रेडक्रसको सम्मान ग्रहण गर्नुभएको थियो ।
रेडक्रस तनहुँ शाखाले दमौली अस्पतालमा सञ्चालनमा रहेको रक्तसञ्चार केन्द्रलाई निरन्तरता दिन तनहुँ जिल्लाकै सरोकार भएको, तर रेडक्रस तनहुँ शाखाले व्ययभार थाम्न नसक्ने अवस्थामा पुगेको समस्या तर्फ जिल्ला समन्वय समिति तनहुँ समेत दशवटै स्थानीय तहको ध्यानाकर्षण गरेको थियो । साथै तनहुँ स्थित नीजि अस्पताल, सरकारी कार्यालय, गैरसरकारी संघ सस्था प्रदेश तथा संघीय साँसदहरु समेतको सहयोगमा रक्तसञ्चार केन्द्रलाई निरन्तरता दिन सहकार्यको आवश्यकता रहेको साधारण सभामा औल्याईएको थियो ।
साधारण सभालाई शुभकामना मन्तब्य राख्ने क्रममा सबै अतिथिहरुले प्रस्ताव सहित आएका बखत रक्तसञ्चार केन्द्रलाई आर्थिक सहयोग गर्ने प्रतिबद्धता सो अवसरमा जाहेर गर्नुभएको थियो । सभालाई प्रमुख अतिथि शान्तिरमण वाग्ले, भिमाद नगरप्रमुख दधिराज सुवेदी, भानु नगरप्रमुख आनन्द त्रिपाठी, घिरिङ्ग गाउँपालिकाका प्रमुख होमबहादुर थापा, व्यास नगरपालिकाकी उपप्रमुख इन्दिरा दरै, रेडक्रसका केन्द्रिय सदस्य प्रदीप घिमिरे, पूर्व सभापति रामनाथ भट्टराई, व्यास नगरका प्रथम नगरप्रमुख ताराप्रसाद श्रेष्ठ, सभासद केशमायाँ गुरुङ्ग, रमिला भण्डारी लगायतले शुभकामना मन्तब्य राख्नु भएको थियो । व्यास नगरपालिकाका प्रथम नगरप्रमुख ताराप्रसाद श्रेष्ठले तनहुँ सदरमुकामको अस्पतालमा एक रक्तसञ्चार केन्द्रको आवश्यकता महसुस गरी २०७२ सालमा पहल गरेर स्थापना गरिएको चर्चा गर्दै यसलाई बचाउन स्थानीय सरकारहरुले जिम्मेवारी लिनु पर्ने बताउनु भएको थियो ।
नेपाल रेडक्रस सोसाईटी तनहुँ शाखाका सभापित कृष्णहरि वाग्लेको सभापतित्वमा भएको सो साधारण सभामा आमन्त्रित प्रमुख अतिथि, अतिथि, सहभागि सभासदहरुलाई उपसभाति ऋषिराम पोख्रेलले स्वागत गर्नुभएको थियो । मन्त्री चिनु पोखरेलले कार्यक्रमको सञ्चालन गर्नुभएको थियो । कार्यक्रम छोट्याउन सभासदहरुको अनुरोध गरेपछि उद्घाटन सत्रमा मन्त्रीले पेश गरेको प्रगतिप्रतिवेदन र कोषाध्यक्षले पेश गरेको आर्थिक प्रतिवेदन अनुमोदन गरी उद्घाटन सत्र समापन गरिएको थियो ।