चौथो ऋषिङ अल्ट्राम्याराथन

ऋषिङ/ऋषिङ गाउँ पालिकाको आयोजनामा पौष २७ गते चौथो ऋषिङ अल्ट्रा म्याराथन–२०८१ हुने भएको छ ।
शनिबार पत्रकार सम्मेलन मार्फत दिइएको जानकारी अनुसार ऋषिङ प्रवेशद्वार धारुङबाट प्रारम्भ हुने प्रतियोगिता वडा नं ३ को दुभुङ स्थित भूटावरमा पुगेर समापन हुने छ ।
४२.२ किमी अल्ट्रा म्याराथनको रुट धारुङबाट रानी पोखरी, शिवसरस्वती मावि, वडा नं ७ को कार्यालय, अर्खलाछाप, केराउदी, काफलडाँडा, पुरानो ऋषिङ, धरमपानी, पुरानो ऋषिङ चालिसे, गापा कार्यालय, गोठादी, ढुङ्गाडे, चालिसे, थप्रेक, भिर्काेट, अर्चल्दी, दाङश्री, काफलडाँडा, रिजाल्दी, मौरीवास, दुबुङ हुँदै दुबुङ भूटावर हुने आयोजकले जनाएको छ ।
पौष २६ गते ४ बजेसम्म सहभागी हुन चाहने धावकले निःशुल्क नाम दर्ता गर्न सक्ने पालिकाले जनाएको छ । धावकहरुका लागि २६ गते नै अभिमुखिकरण कार्यक्रम समेत रहेको जनाइएको छ ।
प्रतियोगितामा प्रथम हुने धावकले नगद रु ६५ हजार पुरस्कार पाउने छन् । यसैगरी द्वितीय हुने धावकले नगद रु ४० हजार, तृतीय हुनेले नगद रु २५ हजार तथा सान्त्वना स्थान प्राप्त गर्ने धावकले नगद रु १० हजार प्राप्त गर्ने छन् । यी सबै पुरस्कार कर बाहेक हुने आयोजकले जनाएको छ ।
खेलकुद मार्फत पर्यटनको विकास गर्ने लक्ष्यका साथ ऋषिङ गाउँ पालिकाले अल्ट्रा म्याराथनका अतिरिक्त महिलाका लागि ७ किमीको दौड , भलिबल प्रतियोगिता लगाएत गर्दै आएको छ ।