दुलेगौंडा/कांग्रेस महमन्त्री विश्वप्रकाश शर्माले कांग्रेस कार्यकर्ताले आफ्नो शक्ति चिन्नु पर्ने बताएका छन् ।
शनिबार तनहुँ क्षेत्र नं २ को क्षेत्रीय सम्मेलनलाई सम्बोधन गर्दै महामन्त्री शर्माले उक्त कुरा बताएका हुन् । उनले भने, “कांग्रेस एकसय चार वर्ष लामो राणा शासन फाल्न समर्थ भयो अनि ३० वर्षे पञ्चायत फाल्न सफल भयो । यस्तो पार्टीको कार्यकर्ताले आफुभित्र भएको अथाह उर्जालाई चिन्न जरुरी छ ।” महामन्त्री शर्माले बन्दुकको नालबाट राज्यशक्ति प्राप्त गर्न सकिन्छ भनेर बन्दुक बोकेर हिँडेका माओवादीलाई लोकतान्त्रिक पद्धतिमा ल्याउन कांग्रेस सफल भएको भन्दै कांग्रेसको यो शक्तिलाई चिन्न र सोही अनुसार काम गर्न नेता कार्यकर्तालाई आग्रह समेत गरे । शर्माले कांग्रेस भित्र पार्टीले गरेका राम्रा कामको प्रचार नगर्ने, विपक्षीले गर्ने आक्रमणमा तथ्यगत रुपमा प्रतिवाद नगरी आफै बुझ्छौ भनेर पन्छाउने, चोक, चियापसल र चौतारामा बसेर आफ्नै दल र दलका साथीहरुको कुरा काट्ने जस्ता समस्या रहेको उल्लेख गर्दै आगामी दिनमा यस्ता कुराहरु सच्याएर जान नेता कार्यकर्तालाई आग्रह गरे ।
कार्यक्रममा कांग्रेस जिल्ला सभापति जितप्रकाश आलेले आसन र भाषण प्रियताले कांग्रेसका कार्यक्रमहरु चुस्त हुन नसकेको बताए । निवर्तमान सभापति बैकुण्ठ न्यौपानेले क्रियाशिल सदस्यता वितरणका मापदण्ड स्पष्ट पार्न आग्रह गरे । उपसभापति राजेन्द्रकृष्ण श्रेष्ठले श्रृङ्ग पथको दूरावस्थाले तनहुँको दक्षिणका नागकिरले दुःख पाएको विषय प्राथमिकाता साथ उठाएका थिए ।
कार्यक्रममा जिल्लाका दशवटै पालिकाका कांग्रेस सभापतिहरुले मन्तव्य राखेका थिए । मन्तव्यका क्रममा उनीहरुले सदस्यता र क्रियाशिल सदस्यता प्रणालीमा सुधार आवश्यक भएको ,पराजयलाई स्वीकार्न कठिन हुने गरेकोे, पदप्राप्तीका लागि दौडधुप गर्ने तर प्राप्त पछि सुस्ताउने गरेको, निर्वाचनमा खट्नेभन्दा हार पछि पछुताउनेको संँख्या बढ्दै गएको,सार्वजनिक कार्यक्रमको व्यवस्थापन चुस्त नभएको, टिकट वितरणमा पारदर्शिता नभएको, पार्टी नेतृत्व र जनप्रतिनिधिबीच समन्वय नभएको, सकुम्बासी समस्या समाधानमा चासो नगएको, पार्टीको अपेक्षित सहयोग नहुँदा स्ववियु निर्वाचनमा हार व्यहोर्नु परेको जस्ता विषय उठाएका थिए ।
क्षेत्रीय सभापति चुडामणी खनालको अध्यक्षतामा दुलेगौँडामा सम्मेलन सम्पन्न भएको हो ।