प्लाष्टिकका झोला प्रयोग गर्ने र गराउनेलाई जरिवाना

दमौली/व्यास नगरपालिका तनहुँले व्यास क्षेत्रमा प्लाष्टिकको झोला प्रयोग गर्ने र गराउने दुवैलाई जरिवाना गर्ने भएको छ । प्लाष्टिक झोलाले वातावरण प्रदुषित गरेको र नगरपालिकालाई वातावरणमैत्री बनाउने उद्धेश्य सहित नगरपालिकाले व्यास क्षेत्रमा जेठ १ गते देखि ‘प्लाष्टिक झोला मुक्त अभियान’ शुरु गरेको हो । नगरपालिकाले प्लाष्टिक झोला वितरक, प्रयोगकर्ता र उत्पादकलाई विभिन्न जरिवाना गरेको छ । जसमध्ये उत्पादकलाई पहिलो पटक दुई हजार, दास्रो पटक चार हजार र तेस्रो पटक छ हजार जरिवाना तोकेको छ । त्यस्तै, वितरकलाई पहिलो पटक पाँच सय, दोस्रोपटक एक हजार र तेस्रो पटक तीन हजार जरिवाना तोकेको छ भने प्रयोगकर्तालाई पहिलो पटक दश र दोस्रो पटक पचास रुपैया जरिवाना तोकिएको छ । साथै, प्लाष्टिक झोला प्रयोग गर्ने र गराउनेको सुचना दिनेलाई जरिवानाको ५० प्रतिशत रकम पुरस्कार स्वरुप प्रदान गरिने नगरपालिकाले जनाएको छ ।