कमलबारी/ व्यास १२ कमलबारीका छविदीप आले र सृजना आलेले छोरीको जन्मदिन फरक ढंगले मनाएका छन् ।
आले दम्पत्तीले छोरी सान्वीको जन्मदिनको अवसर पारेर घर छेउमा रहेको सिद्धेश्वरी माध्यमिक विद्यालयमा पूर्व प्राथमिक देखि कक्षा ५ सम्म पढ्ने बालबालिकालाई विभिन्न शैक्षिक सामग्री वितरण गरेका हुन् । कक्षा ४ सम्मका विद्यार्थीलाई पेन्सील, इरेजर, पेन्सील कटर, कापी तथा ड्रईङ कपि एक–एक वटा तथा कलर पेन्सील सेट एउटा वितरण गरिएको तथा कक्षा ५ मा अध्ययनरत विद्यार्थीलाई ति शैक्षिक सामग्रीका अतिरिक्त डटपेन थप गरेर वितरण गरिएको आलेले बताए ।
हरेक वर्ष फरक यस्तै तर फरक काम गरेर छोरीको जन्मदिन मनाउने योजना रहेको बताएका आले दम्पत्तीले सोही अवसरमा विद्यालयको पुस्तकालयलाई दुइवटा पुस्तक समेत उपहार प्रदान गरे । सोही विद्यालयको शिक्षक समेत रहेका छविदीपले फरक ढंगले जन्मदिन मनाउने परम्पराको विकास होस् भन्ने हेतुले आफुले छोरीको पहिलो जन्मदिन विद्यार्थीलाई शैक्षिक सामाग्री प्रदान गरेर मनाएको बताए ।
आर्थिक हिसाबले अधिकांश विद्यार्थीका अभिभावक कमजोर रहेको बताउँदै विद्यालयका प्रधानाध्यापक नारायणप्रसाद अधिकारीले शिक्षक आलेको परिवारले प्रदान गरेको शैक्षिक समाग्रीले विद्यार्थीको पठनपाठनमा महत्वपूर्ण सहयोग पुग्ने बताए । प्रअ अधिकारीले यसले अरुमा पनि फरक ढंगले जन्मदिन मनाउने सन्देश जाने विश्वास व्यक्त गरे । सात हजार रुपैयाँ बराबरको शैक्षिक सामाग्री ४५ जना विद्यार्थीलाई प्रदान गरियो ।