अदालतले ग¥यो तारीख, पेशी र मुद्धा दर्ता व्यवस्थापन
दमौली/नेपाल सरकारले चैत्र ११ गतेबाट घोषणा गरेको बन्दाबन्दी साउन ६ गतेबाट समाप्त भएको घोषणा गरेसंगै तनहुँ जिल्ला अदालतले पनि बुधबार बार बेञ्चको बैठक राखेर अनुमोदन गराई कार्य तालिका र तारीख तालिका सार्वजनिक गरेको छ ।
तारीख व्यवस्थापनः
वन्दावन्दी भन्दा अगाडि अदालतले तारीख तोक्दा चैत्र ९ गतेदेखि ११ गतेसम्म तारीख तोकिएका मुद्धाका पक्षहरुले साउन ११ गतेदेखि १६ गतेसम्म तारीख लिन आउन आव्हान गरिएको छ । त्यसैगरी चैत्र १२ गतेदेखि १७ गतेसम्म तारीख तोकिएका मुद्धाका पक्षहरुले साउन १८ गतेदेखि २३ गतेसम्ममा आफ्नो तारीख लिन आउन भनिएको छ । त्यसैगरी चैत्र १८ गतेदेखि २३ गतेसम्म तारेख तोकिएका मुद्धाका पक्षहरुले साउन २५ गतेदेखि ३० गतेसम्म तारीख लिन सक्ने गरी व्यवस्थापन गरिएको छ । चैत्र २४ गतेदेखि पछिको तारीख तोकिएका सबै मुद्धाका पक्षहरुले साउन ३२ गतेदेखि भाद्रको पाँच गतेसम्म तारीख लिन आउन अदालतबाट आव्हान गरिएको छ ।
अदालतको कार्यतालिका अनुसार साउन सात गतेदेखि ९ गतेसम्म आन्तरिक तयारी अवधी राखेको छ । १८ महिना नाघेका र अंग पुगेका मुद्दाहरुको हकमा एक पक्ष मात्र आएमा पनि १५ दिन कटाएर साधारण तारेख दिने व्यवस्था मिलाइएको छ । बन्दाबन्दी खुलेको मितिले ३० दिनसम्म तारेखमा हाजिर हुन आउन पाउने समयलाई ख्याल गरी अन्य मुद्धाको हकमा एक पक्ष मात्रै उपस्थित भएको अवस्थामा ३० दिन कटाएर साधारण तारेख दिने व्यवस्था मिलाईएको छ ।
दुवै पक्ष उपस्थित भएका मुद्धा, थुनुवा मुद्धा, नेपाल सरकार वादी भएका मुद्धा र एकतर्फी भएका मुद्धाहरु बार बेञ्चको मतैक्यतामा साउन १८ गतेबाट पेशी चढाईने भएको छ । साउन १८ गतेबाट बकपत्र प्रारम्भ गरिने भएको छ । जनचापलाई व्यवस्थापन गर्न कम्तिमा एकवटा मुद्धामा साक्षी वकपत्र गराईने भएको छ । बढीमा तीन मुद्धाको वकपत्र गर्न अदालत प्रशासन प्रयासरत रहेको तनहुँ जिल्ला अदालतका स्रेस्तेदार विदुरकुमार उपाध्यायले बताउनु भयो ।
अदालतले साउन १६ गतेबाट म्याद तामेली सुचारु गर्ने भएको छ । विशेष प्रकृतिका निवेदनहरुमा साउन १६ गतेबाटै डोर जाने व्यवस्था मिलाईएको भएता पनि तहसिल शाखाको नियमित कार्यका लागि भाद्र ५ गतेबाट डोर खटिने व्यवस्था मिलाइएको बार बेञ्च अन्तरक्रिया कार्यक्रममा जानकारी गराइएको छ ।
अदालतबाट प्रदान गरिने सेवाहरु छिटो सकिदिन उचित व्यवस्थापन मिलाउने प्रतिबद्धता जनाएको अदालतले हदम्याद र म्यादको सवालमा बाहेक मिलापत्र, फिराद र प्रतिउत्तर तीन बजेभित्रै ल्याइदिन आग्रह गरेको छ । अदालत प्रवेश गर्दा गेटमा रहेका धारामा हात धुने, सेनिटाईजर लगाउने, मास्क लगाउने तारीखमा हाजिर हुन आउँदा लेख्ने कलम साथमा लिएर आउनमा कानुन व्यवसायीहरुले पनि सहजीकरण गरिदिने अपेक्षा अदालतले राखेको छ । अदालतको भिडभाड कम गर्न सेवाग्राहीले साथी नलिईकन आउने अपेक्षा अदालतको रहेको छ । कानुन व्यवसायीहरु अदालतमा धेरै बेर पालो पर्खेर बस्दा बढी देखिने जनचापलाई कम गर्न पेशीको पालो आएपछि टेलिफोनबाट सूचना दिने व्यवस्था मिलाई दिन अदालतसंग आग्रह गरेका
छन् ।
लकडाउनको अवधिमा तारीख तोकिएका मुद्धाका पक्षहरुले भिड व्यवस्थापन अन्तरगत तोकिएको तारेख दिने सम्बन्धी तालिकामा आउन असम्भव भएमा भाद्रको सात गतेसम्म सार्वजनिक विदाको दिन बाहेक जुनसुकै दिन आएपनि तारेख दिन सकिने गरी अदालतले शून्य समयपछिको तीस दिनको सुविधा प्रदान गर्ने भएको छ ।