साहित्य सम्मेलन स्थगित

दमौली/“भाषा, साहित्य, संस्कृतिको उत्थान साहित्यिक जागरण हाम्रो अभियान” भन्ने नाराका साथ दमौलीमा फागुन अन्तिम साता हुन लागेको दोस्रो राष्ट्रिय साहित्य सम्मेलन स्थगित भएको छ । गण्डकी वाङ्मय प्रतिष्ठान तनहुँको आयोजनामा हुन लागेको सम्मेलन हाललाई स्थगित गरिएको प्रतिष्ठानका अध्यक्ष सागर उदासद्वारा मंगलबार जारी विज्ञप्तीमा जनाइएको छ ।
विज्ञप्तीमा भनिएको छ,सम्मेलनको पूर्ण तयारी भइसकेको अवस्थामा अहिले संसारभरका मानिसलाई कोरोना भाइरसले त्रस्त बनाएकोले नेपाल सरकार र जिल्ला प्रशासन कार्यालय तनहुँले आम नागरिकको स्वास्थ्यलाई ध्यानमा राखी कुनै पनि सभा सम्मेलनको आयोजना नगर्न निर्देशन र सूचना जारी गरेको हुँदा प्रतिष्ठानद्वारा फागुन २४–२६ गते गर्ने भनिएको सम्मेलन र प्रतियोगिता हाललाई स्थगित गरिएको छ ।
यस अघि शनिबार नेपाल पत्रकार महासंघको सभा कक्षमा आयोजित पत्रकार सम्मेलनमा फागुन २४,२५ र २६ मा राष्ट्रिय साहित्य सम्मेलन तथा कविता प्रतियोगिता हुने जानकारी गराइएको थियो ।