पृथ्वी राजमार्गको पोखरा मुग्लिन खण्ड विस्तारको क्रम चलिरहेको छ । आँबुखैरेनी. जामुने एक खण्ड र जामुने–पोखरा अर्को खण्ड गरि भइरहेको सडक विस्तारले अपेक्षित गति भने लिन्न सकेको छैन । चिनीया कम्पनीले विस्तारको जिम्मा पाएको पुर्वी खण्ड (आँबुखैरेनी–जामुने) को काम सम्झौता अवधी सकिन केही दिन मात्र बाँकी रहँदा ५० प्रतिशत सकिएको छ । उता अर्को चिनीया कम्पनीले विस्तारको जिम्मा पाएको पश्चिम खण्ड (जामुने–पोखरा) को काम त झन सुस्त छ । सम्झौता अवधि सकिन चार महिना मात्र वाँकी रहँदा यो खण्डको काम एक चौथाइ पनि सकिएको छैन । यसले चीनियाहरु समयमा काम सक्छन् भन्ने हाम्रो विश्वास खण्डित भएको छ । साथै यसले थुप्रै जनस्वास्थ्य र आर्थिक समस्या ल्याएको छ ।
दमौली बजार क्षेत्रका र सडक सीमा भित्रका घर भत्काउन गरिएको ढिलाइले विस्तार कार्यमा थप ढिलाइ भएको छ । यहाँ मात्रै डेढ दर्जन बढि घर भत्काउनु पर्ने अवस्थाका छन् । घर धनीले उचित मुआब्जा लिइसकेका छन् तर सम्वन्धित सम्पूर्ण निकायको आग्रहलाई वेवास्ता गर्दै घर भत्काउने काममा अटेरी कायमै छ । सार्वजनिक जग्गा हडपेर घर संरचना बनाउने, राज्यले उदारमन बनाएर मुआब्जा दियो त्यो पनि लिने तर घर–संरचना नभत्काउने ? दुइचार दिन भएपनि थप घरभाडा असुल्ने लोभ मात्रै हो या दलको आडमा
दादागिरी ?
घर–संरचना भत्काउन गरिएको ढिलाइले सडक विस्तारको लागत बढ्ने पक्का छ । दातृ निकायको ऋण सहयोगमा भइरहेको सडक विस्तार को लागत बढ्दा ऋणको भार थपिने त हामी नागरिकलाइ नै हो । यो सँगै जनस्वास्थ्यमा पर्ने तत्कालिन र दीर्घकालिन असरको त हिसाव नै भएको छैन । त्यसैले क्षणिक लोभमा परेर या दलको आडमा दादागिरी गरेर जे भएपनि घर भत्काउन अटेरी गर्ने हरुलाई खबरदारी गर्नै पर्ने भएको छ । दलहरुले अटेरिमा साथ दिएका भए त्यसको हिसाव निर्वाचनका बेला नागरिकले मिलान गर्ने समेत हेक्का रहोस् । त्यसैले हाम्रो आग्रह, सडक बनाउने बाटो खोलिदिउँ ।