बन्दिपुर/ब्राह्मण समाज बन्दिपुरले संस्कार र अस्तित्व जोगाउने अठोट गर्दै आफ्नो दोस्रो अधिवेशन सम्पन्न गरेको छ ।
समाजका अध्यक्ष बामदेव भट्टराईको अध्यक्षतामा आयोजित उक्त गरिमामय सभामा प्रमुख अतिथिको आसनबाट बोल्दै ब्राह्मण समाज तनहुँका अध्यक्ष कृष्णचन्द्र पाण्डेले ब्राह्मण समुदाय विरुद्ध जगाइएको वर्तमान समयको नकारात्मक भावनाको सचित्र चर्चा गर्नुभयो ।
प्रमुख अतिथि पाण्डेले लोपोन्मुख हाम्रो मौलिक संस्कारलाई पुनर्जीवित गर्ने अभियानलाई सार्थक तुल्याएको दिनमा मात्रै हाम्रो साँगठनिक जन्मको मर्मवोध हुन्छ भन्नुभयो । विपन्नता, शोषित पीडित वर्ग केन्द्रित आरक्षण हुनुपर्नेमा सामाजिक सद्भाव र सहिष्णुता भड्काउने योजनबद्ध आरक्षणले नेपाली समाजको पहिचान मेटाउन लागेकोप्रति पाण्डेले चिन्ता व्यक्त गर्नुभयो ।
कार्यक्रममा जिल्ला सचिव कृष्णहरि गैरेले व्यक्ति, समाज र राष्ट्रको अन्तरसम्बन्धलाई केलाउँदै हाम्रो आचरण अनुसारको गतिविधिमा प्रतिबद्ध हुँदा समाजिक अस्तित्व बलियो बलियो बनाउन सकिने धारण राख्नुभयो । पूर्व केन्द्रीय सदस्य गोवर्धन भट्टराई, रामचन्द्र भट्टराई र कृष्णचन्द्र भट्टराई लगायतका वक्ताहरूले नयाँ पुस्तालाई आफ्नो संस्कारसँग परिचित गराउँदा हाम्रो पहिचान र संस्कारको जगेर्ना र सम्बद्धन गर्न सकिने धारणा राख्नु भयो ।
दोस्रो अधिवेशन बन्द सत्रको प्रक्रिया पुरा भएपछिको निर्वाचन कार्यक्रमबाट श्रीप्रसाद पौडेलको अध्यक्षतामा नयाँ कार्यसमिति निर्विरोध चयन गरेको भएको छ ।
नयाँ कार्यसमितिलाई उपस्थित सबैले बधाई ज्ञापन गर्दै संस्थाको उद्देश्य अनुसारको कार्यमा अगाडि बढ्न प्रेरित गर्दै आफूहरुको पूर्ण सहयोग रहने प्रतिबद्धता जाहेर गरेका थिए ।