पुरक परीक्षार्थीलाई विद्यालयमै पढाउन व्यासको आग्रह

दमौली/एसईईको पुरक परीक्षामा सहभागी हुने विद्यार्थीहरुलाई सम्बन्धित विद्यालयमा नै पढाउने व्यवस्था गर्न व्यास नगरपालिकाको कार्यालयले विद्यालयहरुलाई आग्रह गरेको छ ।
सोमबार एक सूचना प्रकाशित गर्दै व्यास नपा शिक्षा शाखाका प्रमुख केदारराज आचार्यले नगरपालिका भित्रका माध्यमिक तह कक्षा १० सञ्चालित भइ २०८० सालको माध्यमिक शिक्षा परीक्षामा सहभागी गराउने सामुदायिक तथा संस्थागत विद्यालयका विद्यार्थीहरुको सिकाइ उपलब्धि तथा उत्तीर्ण दर अत्यत न्यून रहेको विषयमा कार्यालयको ध्यानाकर्षण भएको उल्लेख गरेका छन् ।
आचार्यले विषयगत रुपमा सिकाइ उपलब्धि एन. जी. (नट ग्रेडेड) प्राप्त गर्ने विद्यार्थीहरुका लागि मौका परीक्षामा सहभागी भई पुनः परीक्षा दिन पाउने व्यवस्था राष्ट्रिय परीक्षा बोर्ड परीक्षा नियन्त्रण कार्यालय कक्षा १० ले व्यवस्था गरेको उल्लेख गर्दै सम्बन्धित विद्यालयका विषयगत शिक्षकहरु जवाफदेहीताका साथ आफ्ना आफ्ना विद्यार्थीहरुलाई समयमै सूचना प्रदान गरि सम्बन्धित विद्यालयमा कक्षा सञ्चालन गर्नुहुन अनुरोध गरेका छन् ।
सूचनामा कक्षा सञ्चालन भए नभएको कार्यालयले अनुगमन गर्ने उल्लेख गर्दै कक्षामा सहभागि हुने विद्यार्थी संख्या तथा विषयगत शिक्षकको दैनिक कार्यतालिका शिक्षा शाखा व्यासमा पेश गर्न समेत आग्रह गरिएको छ ।
तनहुँ र अन्य कतिपय जिल्लाभित्रका पालिकाहरुले पुरक परीक्षार्थीहरुका लागि आवासको सुविधा सहितको निःशुल्क कक्षा सञ्चालन गर्ने तयारी गरिरहँदा व्यासले भने यस्ता विषयमा कुनै पहल थालेको बुधबार साँझसम्म कुनै सूचना प्राप्त भएको छैन ।