दमौली/नेकपा एमालेबाट माधव कुमार नेपाल समूह फुटेर अर्को पार्टी दर्ता गराए पछि बाँकी एमालेको पुस २३ गते हुन लागेको नवौं अधिवेशनमा टुकराज/केदार र किरण गुरुङ्गको दुई कित्ता देखिन थालेको छ ।
दुई कित्ता मध्ये किरण गुरुङ्गको कित्ता कमजोर देखिएको छ । अहिलेसम्मको अवस्थामा किरण गुरुङ्ग समूहले अध्यक्ष, उपाध्यक्ष र उपसचिवमा दावी छाडेर सचिव सहितको केही सदस्यमा दावी गर्ने अवस्था देखिएको छ । अहिलेसम्म देखिएको अवस्थाले कार्यवहाक अध्यक्ष श्रीप्रसाद श्रेष्ठ नै अध्यक्षको एकल उम्मेदवार हुने अवस्था रहेको छ । तथापि सबै पदमा भने सर्वसम्मति हुने अवस्था देखिदैन । उपाध्यक्षमा हरिराज कँडेलको नाम अग्रपंक्तिमा देखिएको भएतापनि सचिवको दावेदारहरुलाई उचित व्यवस्थापन पछि मात्रै उपाध्यक्ष सर्वसम्मतिमा छनौट हुने अवस्था देखिएको छ । पदाधिकारीमा दावी राखेका प्रदीप अधिकारीले उपसचिवमा दह्रो दावी राखेको देखिन्छ । यसरी हेर्दा सचिवमा मात्रै विष्णुभक्त सिग्देल र राजेश्वर ढकालको चुनाव हुने अवस्था देखिएको छ । यो अवस्थालाई नेताहरुले भरखर पार्टी फुटेको अवस्थामा विभाजन नदेखाउने सदासयताले सचिव किरण समूहका विष्णुभक्त सिग्देललाई दिएर राजेश्वरलाई उपसचिवमा मनाउन सक्ने पनि प्रवल संभावना देखिएको छ । सदस्यमा त झनै चुनावमा जाने अवस्था नआउने विश्लेषण गरिएको छ ।
नवौं जिल्ला अधिवेशनका प्रतिनिधि छनौट गर्न अहिले नेकपा एमालेका जिल्लास्तरका नेताहरु गाउँ गाउँमा पुगेको पाईन्छ । देवघाटको वडा नं. ५ ले ११ जना प्रतिनिधि छनौट गरिसकेको समाचार आएको छ । प्रत्येक वडाका संगठित सदस्यहरु २० जना बराबर एकजना खुल्ला तर्फको प्रतिनिधि छनौट गर्नेछ । त्यसैगरी महिलातर्फ १५ जना बराबर एक जना प्रतिनिधि छनौट हुनेछ । यो काम पुस १६ गते हुनेछ । प्रत्येक पालिकाबाट दलित तर्फको दश संगठित सदस्य बराबर एक जना प्रतिनिधि छनौट हुनेछ ।
अल्पसंख्याकमा पाँच जना बराबर एक जना छनौट भएर आउनेछन् । जिल्लाभरका अपाङ्गता भएका संगठित सदस्यहरु मध्येबाट पाँच जना बराबर एक जना प्रतिनिधि जिल्ला अधिवेशनका लागि छनौट भएर आउनेछन् । १६ गते वडाबाट निर्वाचित हुने प्रतिनिधि छनौट गर्ने, १७ गते अपाङ्गता र मजदूर क्षेत्रका प्रतिनिधि छनौट गर्ने कार्यक्रम रहेको निर्वाचन संयोजक शिवदत्त ढकालले बताए ।
यसरी छनौट भएर आएका कूल प्रतिनिधिको पाँच प्रतिशत जिल्ला अधिवेशन प्रतिनिधि १८ गते बस्ने जिल्ला कमिटिको बैठकले छनौट गर्ने विधानले व्यवस्था गरेको छ ।