
जनमत स्वभाविक रुपमा परिवर्तनको पक्षमा हुन्छ । नयाँ नयाँ सोंच र दृष्टिकोणलाई प्रयोग गर्ने आमजनमतको चाहान हुन्छ । विगतका चुनावी परिणामले देखाएको यथार्थ यही हो । अहिले झनै सरकारी गठबन्धनले बहुदलीय प्रतिष्प्रर्धा र सैद्धान्तिक मूल्य मान्यतालाई ओझेल पारेपछि दलगत अनुशासनको सीमा तोड्न मतदाताहरुलाई अनुकूल बनाई दिएको छ । दलगत नेतृत्वको स्वार्थ पुरा गर्न जनमतलाई दलगत अनुशासनको अस्त्र प्रयोग गर्दा रहेछन् भन्ने सन्देश सरकारी गठबन्धनले दियो । आफ्ना आसेपासे, इमानदार नोकर चाकरहरु, छोरा, छोरी, ज्वाँई, चेलाहरु, भाईभतिजाहरुलाई जागिर खाने नेता बनाउन सरकारी गठबन्धन बनेको निष्कर्षमा पुगेको अहिलेको जनमत त्यो स्वार्थगत गठबन्धनको विपक्षमा खनिएको छ । अहिलेको जनमत स्वतन्त्र उम्मेदवारको पक्षमा उर्लेको
छ । साथसाथै गैरसरकारी गठबन्धन गरेरै भएपनि सरकारी गठबन्धनलाई परास्त गर्नुपर्ने प्रतिक्रियात्मक जनमत बन्दै गएको छ ।
दीपक राज जोशी व्यास नगरपालिकाको प्रमुखमा उठेका छन् । स्वतन्त्र हैसियतमा उम्मेदवारी दर्ता गरेका दीपकराज जोशीले जनमतलाई कदर गर्दै गैरसरकारी गठबन्धन गर्न पुगेका छन् । उनले आफ्नो घोषणा पत्रमा उठाएका सवालहरु, पत्रकार सम्मेलनमा देखाएका प्रतिबद्धताहरु, मनोनयन पत्र दर्ता गर्न जानेबेला उपस्थिति जनमतलाई गरेको सम्बोधनले दीपक राज जोशीमा आजको नगरपालिकाको प्रमुखमा चाहिने सूचना प्रविधिको ज्ञान भएको, जनमतको कदर गर्न सक्ने बौद्धिक क्षमता भएको, खानपान, आहारविहार, साधारण जीवनशैली र उच्च विचार भएको उम्मेदवारले आफ्नो प्रतिबद्धता पुरा गर्न सक्छ भन्ने मूल्याङ्कन नगरवासीले गर्न थालेका छन् । दीपक राज जोशीको साधारण जीवनशैलीले सिधासाधा निमुखा सर्वसाधारण नगरवासीहरुले नगरप्रमुखको कार्यकक्षसम्म सहजै पुगेर दहकस नमानी आफ्ना कुरा राख्न सक्ने वातावरणको नगरपालिका बन्ने विश्वास नगरवासीले गर्न थालेका छन् । नगरवासीहरुबाट उठेको करबाट संचित नगर विकास कोष फजुल भ्रमण, भोजभतेर, नक्कली विल भरपाई, नमिलेको खर्च विवरणमा खर्च हुन पाउँदैन भन्ने विश्वास नगरवासीमा जगाएको
छ । नगरवासीले तिरेको करबाट संचित कोषबाट भएको, हुने खर्च दीपकराज जोशी नगरप्रमुख भएर आएपछि बेरुजुमा रुपमा नगरवासीले पढ्न र सुन्न पर्ने छैन, सही ठाउँमा सदुपयोग हुन्छ भन्ने विश्वास जगाएको छ ।
व्यास नगरपालिकाको नगर प्रमुखमा स्वतन्त्र उम्मेदवारी दिएर उत्रेका दीपकराज जोशीको अभियानलाई साथ दिन नेपाली काँग्रेसका दीर्घबहादुर थापा क्षेत्री, चुडामणि दाहाल लगायतका थुप्रै नेताहरु राजनीनामा नै दिएर उत्रेका छन् । त्यसैगरी भित्रभित्रै साथ दिने नगरवासीहरु पनि खुलेर सम्पर्क कार्यालयमा पुगेर प्रतिबद्धता जाहेर गर्न थालेका छन् ।

नेपाली काँग्रेस नेतृत्वले जनमतको अनादर गरेर सैद्धान्तिक धरातल छोडेर पनि आफूले जित्ने वातावरण बनाउने ध्येयले पार्टीमा खटेका त्याग गरेका निष्ठावान कार्यकर्तालाई पाखा लगाएर नगरप्रमुख भन्दा तलका पदहरुमा भाग बण्डाको मिलान गरेको निष्कर्षका साथ पत्रकार सम्मेलन गरेर नेपाली काग्रेसको साधारण सदस्यता समेत नरहने गरी राजीनामा दिने लहरचलेको छ । नेपाली काँग्रेस तनहुँको दुई कार्यकाल सचिव को भूमिका निर्वाह गरेका, नेपाली काँग्रेसको बरिष्ठ नेता रामचन्द्र पौडेलको निकट रहेर काम गरेका विश्व वास्तोल, पूर्व प्रवक्ता महेश्वर
भट्टराई, दिपेन्द्र पौडेल समेतका नेताहरुले मंगलबार वैशाख १३ गते पत्रकार सम्मेलन गरेरै राजीनामाको घोषणा गरी नेपाली काँग्रेस नेतृत्व विरोधी जनमतको दृष्टान्त दिएका छन् । पत्रकार सम्मेलनमा उपस्थित वडा नं. ५ का वडाध्यक्ष मोहनकुमार श्रेष्ठ र बाबुराम बगालेको अनुहारले पनि विद्रोहको झभल्को दिएको थियो । मौकाको पर्खाईमा रहेको देखाएको थियो । त्यसैगरी बाँकी रहेका केशबहादुर सुनार समेतका थुप्रै नेताहरुले पनि राजीनामा दिने चर्चा चलेको छ ।
व्यास नगरपालिका वडा नं. ३ का वडाध्यक्ष, प्रेमकुमार श्रेष्ठ, सदस्य रविन पौडेलहरु व्यास नगरपालिका भित्र जनताले परिवर्तनको अनुभूति गर्ने गरी काम गर्ने जनप्रतिनिधिहरुमा गनिएका थिए ।
अधिकाँश पुरानै नेतृत्वले दोहो¥याउँन पाउँदा उनिहरुले दोस्रो कार्यकालको नेतृत्व गर्न पाएनन् । जनमतको दवावमा रविन पौडेलले त व्यास नगरपालिकाको वडा नं. ३ को वडाध्यक्षमा विद्रोही उम्मेदवारी नै दिएका छन् ।
तनहुँ उद्योग वाणिज्य संघ दमौली बजार इकाईको अध्यक्षका रुपमा नगरवासीको मन छुने काम गर्न सफलता हासिल गरेका राजकुमार श्रेष्ठ ‘राकु’ले पनि वडाध्यक्षको दावी गरेका थिए । नेपाली काँग्रेसको तर्फबाट व्यास नगरपालिका वडा नं. २ को वडाध्यक्षका रुपमा उम्मेदवारी दिन नपाएपछि राकुले नेपाली काँग्रेसबाट विद्रोह गरेर स्वतन्त्र उम्मेदवारी दिएका छन् । व्यास नगरक्षेत्रका बृषराज श्रेष्ठ जस्ता नेपाली काँग्रेसका अघिल्लो पुस्ताले पनि नेपाली काँग्रेस तनहुँको नेतृत्वले कार्यकर्ता र जनमतको कदर गर्न नसकेको ठहर गरी विद्रोह स्वरुप व्यास नगरप्रमुखमा उम्मेदवारी दिएका छन् । बन्दिपुर गापाका मानकाजी श्रेष्ठले पनि पालिकाको अध्यक्षमा स्वतन्त्र उम्मेदवारी दिएर पार्टीको गलत निर्णयलाई चुनौति दिएका छन् ।
नेपाली काँग्रेसका बरिष्ठ नेता रामचन्द्र पौडेल, केन्द्रिय सदस्य शंकर भण्डारी, गोविन्द भट्टराई, प्रदीप पौडेल, ध्रुब वाग्ले अहिलेका केन्द्रियस्तरका चल्ताफुर्ता नेता हुन् । तर स्वयम शंकर भण्डारी, गोविन्द भट्टराई, प्रदीप पौडेल, ध्रुब वाग्लेहरु अहिलेको नेपाली काँग्रेसको टिकट वितरणबाट सन्तुष्ट देखिएका छैनन् । केही त लुत्रुक्क परेर काठमाण्डौ फर्केका छन् । हिजो गोविन्द राज जोशीलाई पेलेर अगाडि बढ्न पौडेललाई साथ दिएका यी नेताहरु अहिले पौडेलबाट आफूहरु नै पेलिन परेको दुखेसो व्यक्त गरिरहेका छन् । नेपाली काँग्रेस तनहूँको नेतृत्व भित्रको यो बढ्दो असन्तुष्टि र अपवित्र सरकारी गठबन्धनले तनहुँमा नेपाली काँग्रेसले विगतको संघीय निर्वाचनमा भोगेको नियती अहिलेका स्थानीय तहको निर्वाचनमा पनि दोहोरिने अवस्थाको आँकलन नेपाली काँग्रेसभित्रको सिद्धान्तप्रति प्रतिबद्ध निष्ठावान समूहले गरेको छ ।