दमौली/नेपाली कांग्रेसको १४ आंै महाधिवेशन अन्तर्गत भोली शुक्रबार गाउँ तथा नगरका वडाहरुको अधिवेशन हुने भएको छ ।
चौथो पटक श्रावण ३० मा प्रकाशित तालिका अनुसार शुक्रबार देशभरका ७५३ पालिकाका ६ हजार ७४३ वडाको अधिवेशन हुने भएको हो । अधिवेशनले वडा सभापतिका अतिरिक्त अन्य पदाधिकारी र क्षेत्रीय प्रतिनिधि चयन गर्नेछ । प्रकाशित कार्यतालिका अनुसार भाद्र २७ गते गाउँ तथा नगर अधिवेशन हुनेछ भने असोज १ मा प्रदेश सभा क्षेत्रीय अधिवेशन हुनेछ । यसैगरी असोज ५ मा प्रतिनिधि सभाको क्षेत्रीय अधिवेशन हुनेछ भने एक मात्र प्रतिनिधि सभा निर्वाचन क्षेत्र भएको जिल्लामा जिल्ला अधिवेशन सम्पन्न हुनेछ । दुइ वा दुइभन्दा बढी निर्वाचन क्षेत्र भएको जिल्लाको भने जिल्ला अधिवेशन असोज १० मा हुने भएको छ । सात प्रदेशको प्रदेश अधिवेशन कार्तिक १०, ११ र १२ मा हुनेछ भने केन्द्रीय महाधिवेशन मंसिर ९ देखि १३ सम्म काठमाण्डौमा हुने कार्यतालिका कांग्रेसले प्रकाशित गरेको छ ।
पछिल्लो अध्यावधिक विवरण अुनसार ६ लाख ५३ हजार ४३८ पुरुष तथा १ लाख ९९ हजार ७९ महिला र १७६ अन्य गरी ८ लाख ५२ हजार ७११ जना कांग्रेसका क्रियाशील सदस्य रहेका छन्, जो वडा अधिवेशनका मतदाता हुन् । क्रियाशील सदस्यले पालिकाको सभापति चयनमा मत दिनभने पाउने छैनन् ।
सबैभन्दा धेरै ४१.७८ प्रतिशत अर्थात ३ लाख ६७ हजार ६११ क्रियाशील सदस्य खस आर्य रहेको कांग्रेसको आदिवासी जनजाती क्रियाशील सदस्य संख्या २३.६५प्रतिशत अर्थात २ लाख ८ हजार १५९ रहेको छ । यसैगरी ४५ हजार ४१७ दलित, २७ हजार ६१५ थारु, १६ हजार ९७० मुस्लीम, १४ हजार ९१४ पिछडिएको क्षेत्र , ६ हजार ८२९ अल्पसंख्यक र फरक क्षमता भएका कांग्रेस क्रियाशील सदस्यको संख्या २०१ रहेको छ ।
क्रियाशील सदस्य ६ हजार ९३५ रहेको कांग्रेस तनहुँमा यस पटकमात्र ७ हजार ५७९ नयाँ सदस्य थपिएका छन् । यो संगै वडा तहदेखि पालिका, प्रदेश सभा क्षेत्र र प्रतिनिधिसभा निर्वाचन क्षेत्रमा नेतृत्व गर्न चाहनेको संख्या दोब्बर भएको छ । अधिवेशन नजिकिँदै गर्दा समूह बनाएर विभिन्न पदमा उम्मेदबारी दिने क्रम पनि चलेको छ । वडा तहमा पार्टी संरचना सर्वसम्मत वा कम प्रतिस्पर्धामा हुने सम्भावना रहेपनि त्यो भन्दा माथिल्ला तहमा त्यो सम्भावना कम देखिएको छ ।
क्रियाशील सदस्यको संख्या दोब्बरभन्दा बढी हुनुको अर्थ युवाको राजनीतिमा रुचि जागेको भन्ने मान्ने हो भने यस पटकको महाधिवेशनलाई पार्टी भित्रका कुँडाकर्कट बढार्ने र संगठन सुधार्ने अवसरको रुपमा प्रयोग गर्नु पर्ने अवस्था आएको छ । यस्ता कांग्रस पनि छन् जो कांग्रेसलाई निर्वाचनमा पराजित गराउन भूमिका खेल्छन् । एकथरी छन्, अरु बेला कांग्रेस हुँ भन्छन् । कांग्रेसको सदस्य भएका नाताले अनेकौं सुविधा लिन्छन् । ठेकेदार बन्छन् । क्रसर व्यवसायि बन्छन् । लाभको पदमा पुग्छन् । विभिन्न तरहले आर्थिक लाभ प्राप्त गर्छन् । तर निर्वाचनका बेला रुखमा मत दिँदैनन् । मासु, पेट्रोल र पैसाको लोभमा फस्छन् र पार्टीको उम्मेदबारलाई हराउन लागि पर्छन् । यस्ता व्यक्तिलाई पाखा लगाउने र निष्ठावान अनि नागरिकको हितमा काम गर्ने विश्वासिला मानिसलाई पार्टीको सत्तामा सुम्पने अवसरका रुपमा सबै तहका अधिवेशनलाई प्रयोग गर्नु पुराना र थपिएका कांग्रेस सदस्यको दायित्व हो ।