दमौली/नेपाली कांग्रेसले आगामी ५ वर्ष र त्यसपछिको नेपालको स्पष्ट चित्र समेटिएको ‘१० बुँदे प्रतिज्ञा’ बुधबार सार्वजनिक गरेको छ । पार्टीको ऐतिहासिक विरासतलाई युवा ऊर्जा र नयाँ सोचसँग जोड्दै कांग्रेसले समुन्नत र सम्मानित नेपाल निर्माणको लक्ष्य सहितको प्रतिज्ञा पत्र सार्वजनिक गरेको हो ।
काँग्रेसले मुलुकको मुहार फेर्ने र जनताको जीवनस्तर सुधार्ने दृढ संकल्पका साथ जनकपुरमा सार्वजनिक गरेको प्रतिज्ञा पत्रमा “नेपाललाई समुन्नत र नेपालीलाई सम्मानित बनाउने” उद्देश्य राखेर शिक्षा, स्वास्थ्य, कृषि, सुशासन र रोजगारीलाई आफ्नो मुख्य एजेन्डा बनाएको छ ।
हरेक नागरिकको पहिचान र स्वाभिमान सुरक्षित हुने तथा वंश, जाति वा लिङ्गका आधारमा हुने विभेद र हिंसाको अन्त्य गरिने प्रतिज्ञा पत्रमा उल्लेख छ यसैगरी युवाहरूलाई स्वदेशमै मर्यादित अवसर प्रदान गरिने र विदेशमा रहेका नेपालीहरूको ज्ञान र पुँजीलाई मातृभूमिको पुनर्जागरणमा जोडिने भनिएको छ ।
स्वास्थ्यलाई मौलिक अधिकारका रूपमा स्थापित गर्दै उन्नत स्वास्थ्य बीमा लागू गरिन तथा शिक्षालाई लगानीको रूपमा लिई आर्थिक अभावकै कारण कोही पनि गुणस्तरीय शिक्षाबाट वञ्चित नहुने सुनिश्चित गरिने प्रतिज्ञापत्रमा उल्लेख छ । किसानलाई मुलुकको प्रगतिको सारथी मान्दै मल, सिँचाइ, बीमा र बजारको सुनिश्चितता गरी कृषिलाई आधुनिक र मर्यादित पेसा बनाइने, सरकारी निकायमा हुने दलीयकरणको अन्त्य गरी ’डिजिटल नेपाल’ मार्फत भ्रष्टाचार र ढिलासुस्ती रोकिने, “निमुखालाई ऐन र ठूलालाई चैन“ हुने अवस्थाको अन्त्य गरिने कांग्रेसको दाबी छ ।
साना तथा ठूला लगानीकर्तालाई प्रोत्साहन गर्ने, श्रमिकको सामाजिक सुरक्षा सुनिश्चित गर्ने र अवैध सम्पत्ति आर्जनलाई कडाइका साथ नियन्त्रण गर्ने नीति लिइने, राष्ट्रिय हित र सार्वभौमिक समानताका आधारमा छिमेकी र मित्रराष्ट्रसँगको सम्बन्ध सुदृढ बनाउँदै नेपाली राहदानीको सम्मान विश्वभर बढाउने लक्ष्य राखिएको प्रतिज्ञापत्रमा लेखिएको छ ।
नेपाली कांग्रेसले यी प्रतिज्ञाहरूलाई आगामी ५ वर्षभित्र हासिल गर्ने प्रारम्भिक पाइलाको रूपमा व्याख्या गरेको छ । “परिवर्तित समयको चेतनालाई आत्मसात् गर्दै कांग्रेस अब विचारमा प्रष्ट र कार्यशैलीमा चुस्त बनेको” दाबी गर्दै पार्टीले देशलाई सम्हाल्ने र बदल्ने नयाँ संकल्पका साथ जनताको घरदैलोमा जाने बताएको छ । नेपाललाई केवल ‘सगरमाथा र बुद्धको देश’ मात्र नभई एक आधुनिक, प्रतिस्पर्धी र परिणाममुखी लोकतन्त्र भएको राष्ट्रका रूपमा चिनाउने उद्देश्य कांग्रेसले राखेको छ ।