मोतीको सम्झना सुरक्षित तीज मनाउन आग्रह-सम्पादकीय

चाडबाड धमाधम आउन थालेका छन् । हिजो मात्र हामीले कुशे औंशी पर्व मनायौं । यसलाई बुबाको मुख हेर्ने दिनको रुपमा पनि चिनिन्छ । यही दिन नेपाली साहित्यमा युगकवि नामले सुपरिचित मोतीराम भट्टको जन्म भएको दिन पनि हो । विसं १९२३ भाद्र २५ गते कुशै औंशीको दिन जन्मेका मोतीले खासगरी आदिकवि भानुभक्तलाई आम नेपाली माझ परिचित गराउने काम गरे । भानुभक्तको जीवनी लेख्ने देखि उनका फुटकर कविताहरू र अन्य कृतीका बारेमा मोतीरामले अध्ययन, उत्खनन गरी नेपाली समाजमा उजागर गरेका हुन् ।
नेपाली भाषामा गजल लेखनको प्रारम्भ गर्ने मोतीराम श्रृंगार रसले भरिएका गजलहरु लेख्ने गर्दथे । नेपाली साहित्यमा समालोचनाको प्रारम्भ गर्ने व्यक्तिका रुपमा समेत परिचित मोतीरामले आफ्नो जीवनको छोटो कालखण्डमा नेपाली साहित्यमा मलजल मात्र गरेनन् यसको विकासमा उत्तिकै योगदान दिए । उनै मातीका प्रति उनको जन्मदिनको अवसरमा हाम्रो श्रद्धा सहित सम्झना !
अब संधारमा आएको पर्व तीजको कुरा गरौं । कोरोना महामारीका कारण यस पटकको तीज महिला दिदी बहिनीका लागि वितेका वर्षहरुमा जस्तो उत्साह जनक नहुने भएको छ । घरबाट बाहिर निस्केन वातावरण नभएका बेला माइतीघर जाने, दिदी–बहिनी, साथी संगी भेट हुने र नाच गान गर्ने वातावरण यस पटक छैन । देशका अधिकांश भूभागमा बन्दाबन्दीको अवस्था छ । यातायातका साधन चलेका छैनन् ।
पहिलो कुरा त घर बाहिर हिड्ने वातावरण छैन अर्काे कुरा चाहेर पनि हिड्न सहज छैन । र चुरो कुरोे भनेको कोरोना संक्रमणबाट बच्ने हो भने यसपटकको तीज घरमै बसेर र आफ्नै परिवारसंग बसेर मनाउने हो । हाम्रो सामान्य असावधानीले हामी त संक्रमित हुन्छौं नै छोराछोरी, परिवारका अन्य सदस्य तथा इष्टमित्र र छरछिमेकीलाई समेत संक्रमणको जोखिममा लैजान्छौं । हामी घर बाहिर निस्के मात्र कोरोना हाम्रो घर आउने हो । त्यसैले यस पटकको तीज घर भित्रै बसेर अनि आफु र आफन्त सबैलाई सुरक्षित राखेर मनाउन आम नेपाली दिदी बहिनीसंग हाम्रो आग्रह साथै शुभ कामना !