दमौली/विकास अर्थशास्त्री तनहुँका डा. रघुराज काफ्ले स्वास्थ्य बिमा बोर्डको कार्यकारी निर्देशक नियुक्त भएका छन् । गण्डकी प्रदेशको नीति तथा योजना आयोगको उपाध्यक्ष तथा वैदेशिक रोजगार बोर्डको कार्यकारीको अनुभव संगाली सकेका काफ्ले सिफारिस समितिको सुझावका आधारमा छनौटमा परेका तीन जनामध्ये बाट कार्यकारी निर्देशक नियुक्त भएका हुन् ।
सिफारिस समितिले प्रस्तुतीकरण तथा अन्तर्वार्ता पश्चात अन्तिम सूचीमा काफ्लेसहित डा. कृष्णप्रसाद अधिकारी र कमल पन्थीको नाम मन्त्रिपरिषदमा सिफारिस गरेको थियो ।
बिमा सुझाव कार्यदलमा सदस्य काफ्लेले प्रतिवेदनको मस्यौदामा महत्वपूर्ण भूमिका निर्वाह गरेका थिए । तनहुँको व्यास नपा–५ काफ्लेले सोही प्रतिवेदन कार्यान्वयनको महत्वपूर्ण निकायको कार्यकारीको जिम्मेवारी प्राप्त गरेका हुन् ।
वैदेशिक रोजगार बोर्डमा रहँदा काफ्लेले श्रमिक र आश्रित परिवारको हितमा विभिन्न कल्याणकारी नयाँ कार्यक्रम सुरु गरेका थिए। राहत रकममा ४ सय प्रतिशत वृद्धि तथा बिमामा शतप्रतिशत वृद्धि गर्ने निर्णय उनको नेतृत्वमा भएको थियो। गम्भीर रोगका लागि श्रमिक बिमा कार्यक्रम उनले आरम्भ गरेका थिए ।
डा. काफ्ले संयुक्त राष्ट्रसंघीय विकास कार्यक्रममा एक दशक बढी वरिष्ठ अधिकारीका रूपमा कार्यरत थिए । यसैगरी उनी विभिन्न विकास रणनीति निर्माणमा संलग्न रहँदै आएका छन्। अर्थशास्त्रमा विद्यावारिधि काप्लेले लामो समय आदिकवि भानुभक्त क्याम्पसमा प्राध्यापन समेत गरेका थिए ।